د پنجشېر ولایت مقام رسنیو دفتر د یاد ولایت د کرنې، اوبو لګولو او مالدارۍ ریاست له قوله ویلي، چې په دغه ولایت کې پر ۱۰۰ جریبه ځمکې د ګیلاسو د بڼونو جوړولو طرحه د کرنې وزارت له لوري منظوره شوې ده.
د معلوماتو له مخې، دغه پروژه د کرنې وزارت له پراختیايي بودجې څخه د ۱.۵ میلیون افغانیو په لګښت د شتل، عنابې، رخې ولسوالیو او مرکز بازارک مرکز کې پلې کېږي.
سرچینه زیاتوي، چې د دې پروژې له مخې به هر بڼوال ته په یوه جریب ځمکه کې شاوخوا ۱۰۰ د ګیلاسو نیالګي او د بڼوالۍ پنځه ډوله وسایل ووېشل شي.
د پنجشېر د کرنې ریاست په وینا، د دې طرحې پلي کېدل به د بڼوالۍ پراختیا، د مېوو د تولید د زیاتوالي او د بڼوالو د اقتصادي وضعیت په ښه کېدو کې مرسته وکړي.