د امر بالمعروف، نهې عن المنکر او شکایتونو اورېدلو وزارت ویلي، د یاد وزارت د محتسبینو په هڅو تېرو دوه ورځو پر مهال په نهو ولایتونو کې ۲۶ ښځې له کورني تاوتریخوالي او ناوړه چلند څخه ژغورل شوې دي.
د وزارت د معلوماتو له مخې، دغه قضیې په بلخ، سرپل، غزني، فاریاب، تخار، پکتیا، خوست، بدخشان او ارزګان ولایتونو کې د زیانمنو ښځو د خپلوانو له لوري ثبت شوې وې، چې د اړوندو کورنیو له غړو سره یې جلا ناستو کې د ښځو پر شرعي حقونو، له هغوی سره پر ښه چلند او د کورنیو اختلافاتو پر تفاهمیز حل ټینګار کړی دی.
وزارت وايي، د کورنیو له غړو یې ژمنې اخیستې چې له دې وروسته به د ښځو شرعي حقونه مراعاتوي، له هغوی سره به ښه چلند کوي او په کورني ژوند کې به له هر ډول تاوتریخوالي او د کورنۍ د غړو د حقونو له ضایع کولو ډډه کوي.


