افغانستان د طبیعي زېرمو او ارزښتناکو کانونو درلودونکی هېواد دی. که دوامداره امنیت او هدفمند سیاست موجود وي، نو افغانستان کولای شي د خپل هېواد او آن د سیمې ټولې اړتیاوې پوره، اقتصادي او سوداګریز پرمختګ ته ورسېږي. البته دا ټولې چارې په یوه خوندي چاپېریال، منظم پلان او ستراتیژۍ پورې تړلې دي. هغه څه چې تر اوسه یې په دې څو کلونو کې په افغانستان کې شاهدان یو، د اقتصادي بنسټونو د پیاوړتیا په موخه د شته وړتیاوو پر ګټې اخیستنې ځانګړې پاملرنه او تمرکز دی.
لکه مخکې مو چې وویل، امنیت په هره برخه کې د بریا او پرمختګ اساسي رکن دی. خو په دې منځ کې ځینې هغه کسان چې له هېواده تښتېدلي او فراري دي، وخت ناوخت د خپلو تبلیغاتو او د ځان د بازارموندنې لپاره نمایشي حرکتونه ترسره کوي او په دې ماشومانه چلند سره غواړي په هېواد کې د هیلو روانه څپه کمزورې کړي.
تښتېدلي مخالفین چې په بېلابېلو او بې معنا نومونو او عنوانونو هڅې کوي، په حقیقت کې د تش په نوم بریا او پرمختګ پر ځای، همېشه له ماتې سره مخ شوي دي. هغوی د دې پر ځای چې د ځان لپاره کومه پایله ترلاسه کړي، د دښمنانو په ژرنده اوبه وربرابروي او هڅه کوي د هغوی غوښتنې او مطالبې پوره کړي، ترڅو له دې لارې خپل جیبونه ډک کړي او د تضمین شوې راتلونکې لپاره لا ډېر ډاډ او هوساینه ترلاسه کړي.
له همدې امله، د افغانستان اوسنی حکومت له یوې خوا هره ورځ د آبادۍ او پرمختګ په لور ګامونه اخلي، له بلې خوا یې د هېواد په څلورو خواوو کې د مخالفینو ټول نمایشي حرکتونه او خام اقدامات په پوره ځواک او زړورتیا شنډ کړي دي.
له بدخشان څخه نیولې تر نورستان او نورو ولایتونو پورې، تر اوسه د مخالفینو هېڅ یوه ناسنجول شوې هڅه بریالۍ شوې نه ده؛ برعکس، موږ د هغوی د رسوایۍ او ماتې شاهدان وو. خو بیا هم دغه تورمخي مخالفین له خپلو هڅو لاس نه اخلي، ځکه چې د دوی روزي له همدې غربي آدرسونو او د ګاونډیتوب له ترینګلتیاوو څخه تأمینېږي. هغوی پرته له دې چې د وطنوالۍ اصل په پام کې ونیسي، د اغیارو د ګټو لپاره کار کوي.
له همدې امله تر اوسه یې له ناکامۍ او شاتګ پرته بل څه نه دي په برخه شوي او یواځې خپل بار لا درنوي. هغوی لکه څومره چې په عملیاتي ډګر کې ماتې خوړلې، ځاني او مالي زیانونه یې ګاللي، په هماغه کچه او په پرله پسې توګه د نرمې جګړې په ډګر کې هڅې کوي ترڅو له دې لارې حقایق سرچپه وښيي او د خلکو ورځنی ژوند بل ډول انځور کړي. دوی په دې چلند سره هم د دې هېواد د نږدې دښمنانو غوښتنو ته د رسیدګۍ غوښتونکي دي او هم د بهرنیو استخباراتي سازمانونو د غوښتنو پوره کېدو هڅه کوي.
لنډه دا چې مخالفین له هرې هڅې او هر ډول تبلیغاتو سره یواځې خپل ځان لا ډېر رسوا کوي او د پخوا په پرتله پر خپلو څېرو لا ډېر توروالی ورزیاتوي؛ ځکه د افغانستان ځواکمن او ویښ حکومت د هېواد د آبادۍ او د ملي حریم د ساتنې په دوو جبهو کې کې جګړه کوي او هېچا ته اجازه نه ورکوي چې ګډوډي رامنځته او یا نظم اخلال کړي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.


