د شر او فساد ډلو د خيالي اتحاد، «د افغانستان د ژغورنې مجمع» غړي، محمد عمر داودزي ویلي، چې د افغان حکومت د مشر، وروستي اقدامات، څرګندونې او سیاسي اشارې ژور غور او جدي ارزونې ته اړتیا لري.
نوموړي په خپله اېکسپاڼه لیکلي: «زما په آند، دغه بدلونونه ښايي د افغانستان په سیاسي ډګر کې د یوه نوي او احتمالي مهم پړاو د پیل نښه وي؛ داسې پړاو چې د بېړنیو غبرګونونو او له وخته مخکې قضاوتونو پر ځای هوښیارۍ، زغم او ستراتیژیک لرلید ته اړتیا لري.»
داودزي له خپلو همکارانو غوښتي چې په دې حساس پړاو کې له زغم څخه کار واخلي، له بېړنیو پایلو اخیستو ډډه وکړي او د راپورته کېدونکو سیاسي واقعیتونو دقیقه ارزونه وکړي.
نوموړي ټینګار کړی، چې پر دغو بدلونونو د دوی د مشرتابه شورا په کچه دننه کې هر اړخیز بحث او ګډه ارزونه وشي او له هراړخیزو مشورو وروسته يو مسؤولانه دریځ اعلان شي.
د افغان حکومت د مشرتابه وروستيو څرګندونو ته د شر او فساد ډلو بېلابېلو مشرانو متضاد دريځونه څرګند کړي. د دې ډلو ځينو مشرانو د زغم او جګړې ته کولو غوښتنه کړې او ځينو بيا له قيد او شرط پرته د جګړې او شر جوړولو غږ کړی دی.
خو په ټوله کې، د شر او فساد ډلې د غړو دغه متزلزل دریځونه، د نظرونو نه همغږي او په یوه خوله نه اوسېدل په ډاګه کوي چې دوی لا هم د خپلمنځي اختلافاتو په اور کې سوځي او د ګډ دریځ خپلولو توان نه لري.


