وحید الدین حیدر
طالبانو د سیاست په تور بازار کې سپین سیاست کړی، لکه څنګه چې نن سبا له سیاست څخه کاروبار جوړ دی، د سیاستونو او سیاستوالو ډېر مخونه دي، خو د طالبانو سیاست یو مخ لري هغه یو مخ د رښتیني اسلامي سیاست برکت دی.
د جاهلیت په دور کې له بعثت وړاندې حضرت محمد صلی الله علیه وسلم یو امین سوداګر وو، خلکو به خپل مالونه او پیسې له انحضرت صلی الله عليه وسلم سره ساتل.کعبه شریفه پخوا هم نورو ادیانو ته مقدسه وه، کله چې دلته د تهداب ډبره اېښودل کېده، نو هر قوم غوښتل چې دا لوی فضلیت ترلاسه کړي، هماغه و چې د تهداب ډبره منازعې ته لاړه، د اسلام ستر پیغمبر پر لار تېرېده، خلکو غږ کړ چې دغه سړی امین دی راځئ چې دده پر لاسونو دا ډبره کېږدو، هماغه وه چې ډبره څادر کې کېښودل شوه او څلور واړه پیڅکې یې د څلورو قومونو په لاسو کې ورکړې، ډبره یې تهداب کې کېښوده.
د اسلامي امارت د سیاست سرچینه د اسلام مقدس دین دی، چې دغه دین ټګۍ او برګۍ نه پیژني. قول، تعهد او ژمنتیا پکې یو ارزښت دی، داد او معامله پکې یوه فریضه ده.
دلته راځم د بحث اصلي موضوع باندې تمرکز کوم، د ترکمنستان د خارجه وزير خاطره:پرون په عشق آباد کې د افغانستان او ترکمنستان د خارجه وزيرانو په مشرۍ د ټاپي، ټاپ، رېل پټلۍ او دوه اړخيز تجارت او ترانزيت کې د اسانتياوو په اړه تفصيلي کاري مجلس و. افغانستان چې لسيزې يې نوم له يرغلونو، ناامنۍ او بېثباتۍ سره تړلی و، د دغسې د پرمختگ او ابادۍ بحثونه چې ګورم لکه د تاريخ مسير چې بدل وي…لکه د دې ملت د لسيزو قربانيو رنګ راوړی وي.
نورې خبرې پر خپل ځای، د ترکمنستان خارجه وزير چې له ۲۰۰۱ راهيسې د دې هېواد خارجه وزير دی، امارت يې باوري شريک بللی او جالبه خاطره يې ويلې.وایي، ۲۰۰۱ کې چې امريکا پر افغانستان بمبارۍ شروع کړي وې، حالات ډېر کړکېچن وو، خو زموږ کونسلګرۍ په مزارشریف ښار کې لا فعاله وه.
کله چې د بمبارد په مقابل کې د امارت ځواکونو ته مقاومت ناشونی شو او نور له مزار ښار څخه طالبان شاتګ ته مجبوره شول، د دوی مسؤولينو زموږ کونسلګرۍ ته خلطه کې د برېښنا د بيل پیسې راوړې وې او غوښتنه يې کړې وه چې دا مو بیل دی، موږ ځو چې تاسې زموږ پر خلکو بریښنا قطع نه کړئ.
سبا ته امارت له مزار شريف څخه شاتګ وکړ!رشيد مُرَدوف ويلي، زموږ اړيکو کې رښتينولۍ موږ ته دا باور راکړی چې موږ او تاسې پرمخ تللی شو.دا د افغانستان رښتينې او مسؤولانه استازولي ده.