محمد فیصل
پرون د ملګرو ملتونو امنیت شورا غړو د افغانستان له پاره د ځانګړي استازي ټاکلو له پاره یوه ناکامه غونډه وکړه.
دوی د افغانستان له پاره د ځانګړي استازي په ټاکلو سلا نشول او روسیې او چین یې یو ځل بیا مخالفت وکړ.دا غونډه د دوحې د وروستۍ غونډې په دوام وه چې هلته هم د افغانستان له پاره د ځانګړي استازي ټاکلو پر سر ژور اختلافات موجود وو.د ځانګړي استازي پر ټاکلو تر ټولو ډیر ټینګار د امریکا په مشرۍ لویدیځ هېوادونه کوي. د دوی موخه مالومه ده چې له دې لارې د خپلو ګټو د تامین کوشش کوي.
غربیان د همه شمولیت په نوم غواړي چې پخواني مجرمین، د ملت له لوري استفراق شوي سیاستوال او جنګ سالاران په دې ډول په افغان حکومت کې شامل او پر افغانانو یې وتپي.غربیان د بین الافغاني مذاکراتو له لارې یو ځل بیا غواړي چې د بن ناکامه تجربه تکرار کړي او خپل ملاتړي واک ته ورسوي.افغان حکومت تر اوسه په خپلې بریالۍ بهرنۍ پالیسۍ توانېدلی او د چین او روسیې په ګډون یې د سیمې هېوادونه قانع کړي چې افغانستان یو بل ځانګړي استازي ته اړتیا نه لري.
د افغان حکومت تر ټولو لوی دلیل دا دی چې د ملګرو ملتونو د مرستندویه ادارې یا یوناما په موجودیت کې بل استازي ته هېڅ اړتیا نشته.که د غربیانو هدف د افغانستان له حکومت او خلکو سره مرسته او همغږي رامنځته کول وي، نو یوناما خو دغه کار کوي، خو مالومیږي چې غربیان د بل ځانګړي استازي په ټاکلو سره په افغانستان کې سیاسي بې ثباتۍ ته لاره هواروي.
بله مهمه خبره دا ده چې که د سیمې او نړۍ تر شلو پورې هېوادونه کولی شي چې له افغان حکومت سره تعامل وکړي او خپلې اندېښنې او نظریات د خپلو سفیرانو یا شارژدافیرانو له لارې له افغان حکومت سره شریک کړي، غربي هېوادونه یې هم کولی شي.
خو مالومه ده چې غربیان د خپلو ګټو او شومو موخو له پاره بل ځانګړی استازی غواړي، څو د هغه له لارې د بین الافغاني مذاکراتو په نوم یوه بله ډرامه او پروژه پېل کړي.افغان حکومت تر اوسه په ښه شکل او له لویو ګاونډیانو سره د ښه تعامل له لارې توانېدلی چې د غربیانو د نوې ډرامې، پروژې او منافقت مخه ونیسي.