وطنیار افغان
موږ هیواد ته اورونه او جګړې بهرنیانو راوړي دي او راوړي یې، د هغوی د استخباراتو دوکتورین د نیابتي جګړو پروپوزلونه جوړوي، بیا یې پروسس کوي او وروسته ورته مالي او بشري امکانات برابروي او بالاخره له همدې پروپوزلونو یوه پروژه جوړوي، د پروژې د عملي تطبیق لپاره په ساحه کې کار پیلوي، د کار له پيل سره د کار نتایج که څومره وړوکی وي لوی کاور ورته ورکول کیږي.
د ملګرو ملتونو سازمان مشر، موده وړاندې د دې سازمان غړو ته په افغانستان کې د جبهو د چریکي جنګونو ګزارش ارایه کړ.ښه نو داده بهرنیو عناصرو په پراخه پېمانه مداخله نه ده؟د نړۍ لوی ادرس ولې دلته له کورني جنګ څخه ملاتړ کوي؟جنګي جبهو ته ولې دومره هرکلی کیږي؟د نړیوال معتبر ادرس په تالار کې د جنګي جبهو له چریکي کوچنیو حملو ولې په لویه کچه هرکلی کیږي؟د کوچنیو جبهو سر راپورته کول په حقیقت کې د همدغه ادرس یو رواني مانور نه دی نو څه دی؟که پیښې او حوادث د نړۍ په هیڅ هیواد کې نه کېدای بیا که دوی هرڅه ویل باک یې نه کاوه.
دا بله د امریکا یو نظامي سرتیري د امریکا او اسرائیل د مظالمو له امله چې فلسطین کې یې قیامت روان کړی ځان ته یې اور واچوی.که دا کار په افغانستان کې چا کړی وای چې د دې نظام په ضد یې دا ډول اعتراض کړای وای ډاډه یم چې د ټولې دنیا د رسنیو توربینونه به طالبانو ته ور سیخ وای.خو دا پېښه په امریکا کې وشوه ځکه دومره عادي او سرسري واخیستل شوه.
اروپا او امریکا کې داسې سلګونه پیښې کیږي، حتی وسلوالې حملې کیږي مګر د سیاستپوهانو دلیل یې دا وي چې دا عادي پېښې دي. خو زموږ وطن کې عادي پیښې را اخلي او لوی کوریج ورته ورکوي، پړه یې د اسلامي امارت د مسولینو غاړو ته ور اچوي او بیا له دغسې پېښو سیاسي استفادې کوي.لکه څنګه چې عربي سوداګر وتښتول شو، بیا یې مړی ترکیه کې وموندل شو، غرب او امریکا د بښنې سازمان او بشري حقونو له ادرسه په سعودي فشار راوړلو او بیا یې په سعودي ځینې سیاسي غوښتنې ومنلې او دا قضیه ورکه شوه.
په ایران کې د مهسا امیني په نامه یوه فعاله ووژل شوه او د ایران په مقابل کې یې داسې توپانې لارویونونه تنظیم کړل چې دغې څپې میاشتې، میاشتې ونیولې او د ډېرو درنو وژنو، شکنجه کولو او زنداني کولو په نتیجه کې د همسا امیني د عدالت غږ چوپ شو.ممکن ایران نړۍ ته په څه منلو هم ځان له دې جنجاله خلاص کړای وي.
استعمار په هر شکل خپل استعماري امتیازات له لاسه نه ورکوي، د ایران یوه بله تاریخي پېښه هم د دې خبرې په رښتینولۍ د تاید مهر لګوي چې کله ډاکټر مصدق د ایران صدراعظم شو، هغه د ایران نفت او تېل ملي اعلان کړل او په دې کار یې خپل د تېلو او نفتو د استخراج او تصفیې چارې د انګلستان، امریکا، فرانسې او جرمني له منګولو را و ایستلې، نو د ډاکټر مصدق په وړاندې ایرانیان واټونو ته را وایستل شول او مصدق یې له دندې لیرې کړ.
نړۍ ډیره بې رحمه او قدرتمند طاقتونه بیا بیخي وحشي لرلید لري، هر هیواد ته چې لاس ورکوي لستوڼي کې یې ماران او لړمان ورته راوړي وي. د جبهو او وسلوالو اورپکو ساتل، حمایه او د هغوی له داعیې ملاتړ د دوی د خونخوارو ستراتیژیو مهمه برخه ده.