د کرنې، اوبولگولو او مالدارۍ وزارت وايي، په کابل کې یې د نیالگیو کېنولو کمپاین پیل کړی دی، چې زرگونه نیالگي به کېښودل شي.
له یاد وزارت څخه په خپره شوې خبرپاڼه کې ویل شوي، سږ کال یې(د نیالگي کېښودل د وچکالۍ له منځه وړل) شعار ورته غوره کړی دی.
دغه کمپاین چې د بېلابېلو حکومتي چارواکو په شتون کې پیل شو، چې په ترڅ کې به یې زرگونه نیالگي کېښودل شي.
د ریاست الوزراء سیاسي مرستیال مولوي عبدالکبیر د نیالگیو کېښودو په کمپاین کې وویل، چې د نیالگیو کېښودل، ساتل او پالل د ټولو مسوولیت دی او باید سمه ساتنه ترې وکړي. :«د نيالگيو اېښودل او ساتنه يو ديني او وجداني دنده ده چې د ښکلا، پاکې هوا، د اکسيجن په توليد، د اقليمي گواښونو په کمولو، د طبيعي زېرمو او د ځنگلونو په زياتوالي کې اغېزمن تمامېږي، د امارت پلانونه د کوچنيو او لويو بندونو د جوړولو، له پنجشېر څخه کابل ته د اوبو پر لېږد، د کرنې میکانیزه کول، د کروندگرو، بڼوالو او صنعتکارانو د حاصلاتو پر زیاتوالي ور ټول دي، په دې دوو کلونو کې د پام وړ کارونه ترسره شوي او په راتلونکو کلونو کې به دا نور هم ښه شي، له تاسو غواړم چې نیالگي اېښودنه او پالنه يې خپل دیني او وجداني دنده وگڼئ او په دې پروسه کې گډون وکړئ.»
د کرنې چارسمبالي وزیر عطاء الله عمري د نیالگیو کېښودو د کمپاین پر مهال وویل، د کرنې وزارت دنده کرنه، مالداري، بڼوالي، د ځمکو مدیریت او طبیعي سرچینو په برخه کې کار کول دي.
د ښاغلي عمري په خبره، په تېرو دوو کلونو کې په هېواد کې د کرنې او د ځنگلونو د پراخولو په برخه کې گڼ کار شوی.:«تېرو دوو کلونو کې مو د کرنې سکتور په سالم ډول اداره کړ، ځنگلي سیمه مو له ۲.۵ سلنې څخه ۵ سلنې ته لوړه کړه، د اوبو د مدیریت لپاره مو په سلگونو چکډیمونه او بندونه جوړ کړل، کروندگر مو وهڅول چې عصري مالدارۍ ته مخه کړي.
د خصوصي سکتور او ټولنو په همکارۍ له ۸۲ مېلیونو څخه زیات نیالگي مو تولید او خلکو ته وړاندې کړل او کرل شوي دي، دغه نیالگي مثمر او غیر مثمر نیالگي دي.»
نوموړي له خلکو وغوښتل چې په خپلو کورونو، ځمکو او شاوخوا سیمو کې نیالگي کېنوي او سمه ساتنه دې ترې وکړي.
د عمري په خبره، له نړیوالې ټولنې او نړیوالو مرستندویه موسسو څخه مو غوښتي چې د کرنې وزارت سره د زرغونتیا او د اقلیم بدلون د خطرونو په کمولو کې همکاري وکړي.
د کرنې وزارت د معلوماتو له مخې، د ۱۴۰۳کال د نیالگیو کېنولو کمپاین به د افغانستان په ۳۴ ولایتونو کې پیل شي او د هېواد د زرغونتیا په پار به مېلیونونه نیالگي کېنول شي.
د پسرلي په موسم کې د هېواد په گڼو سیمو کې هر کال مېلیونونه نیالگي کېنول کېږي؛ خو د ډېرو کمو یې ساتنه کېږي او نور له منځه وړل کېږي.