د اوسپنې پټلۍ ادارې مشر بخت الرحمن شرافت د اردن په (UIC) کلنۍ غونډه کې گډون کړی، چې په گڼو موضوعاتو یې د نړۍ له بېلابېلو هېوادونو استازو سره لیدلي دي.
د ټولگټو وزارت څخه په خپره شوې خبرپاڼه کې ویل شوي، د اردن په غونډه کې د غړي هېوادونو استازو له لوري د اوسپنیزې کرښې اړوند موضوعاتو باندې خبرې شوې.: «په دغه غونډه کې د سیمي په کچه د اوسپنیزي کرښې د خدمتونو اسانوالي، د خدمتونو ډیجټالیزېشن او همدارنگه د کرښې برېښنایې کېدو په اړه د گډون کونکو له لوري بحث وشو او د اورگاډي د مخابراتي سیستم او اړیکو په اړه نوي سیستمونه وړاندې شول.»
د خبرپاڼې له مخې، د غړو هېوادونو استازو په بندرونو باندې د اورگاډي د تگ راتگ چارو په گړندي کېدو او د چوپړتیاوو په برېښنايي کېدو هوکړه وشوه او د اوسپنې پټلۍ د لا ښهوالي او پرمختگ لپاره باید لا ډېرې هڅې وشي.
په خبرپاڼه کې ویل شوي، د ټولگټو وزارت هڅه کوي چې د هېواد په بېلابېلو بندرونو کې د اوسپنې پټلۍ په رغولو سره د سوداگریزو توکو د لېږد رالېږد او پراختیا په برخه کې اسانتیاوې برابرې کړي.
افغانستان اوسمهال له ایران، ترکمنستان او ازبېکستان سره د اوسپنې پټلۍ له لارې نښلول شوی او خپل سوداگریز توکي د یادو هېوادونو د اوسپنې پټلۍ له لارې د نړۍ گڼو هېوادونو ته لېږي.