د ټولګټو وزارت وياند محمد اشرف حقشناس وايي، د ياد وزارت د اوسپنې پټلۍ مرستیال مولوي محمد اسحاق صاحبزاده په مشرۍ افغان پلاوي د قزاقستان په پلازمېنې استانه کې د اوسپنې پټلۍ د همکاریو سازمان په ۲۴مه غونډه کې ګډون کړی دی.
نوموړي ويلي، افغان پلاوي په دې غونډه کې د سیمهییزو همکاریو پر پراختیا خبرې کړي او د قزاقستان او اذربایجان د اوسپنې پټلۍ ادارو له مسوولینو سره یې هم کتنې ترسره کړې دي.
د هغه په وینا، په دغو لیدنو کې د حیرتان او تورغونډۍ بندرونو د ظرفیت لوړولو موضوع تر بحث لاندې نیول شوې او همداراز د شیرخان بندر له لارې د انتقالاتو د زیاتوالي او د ټرانزیټي اسانتیاوو پر پراختیا هم خبرې شوې دي.