د افغانستان د صنعت او سوداګرۍ وزارت په یوه خبرپاڼه کې ویلي، چې د یاد وزارت وزیر نورالدین عزیزي د افغانستان لپاره د بریتانیا له ځانګړي استازي ریچارډ لیندسي سره په انلاین ناسته کې د اقتصادي اړیکو د پراختیا او له نړیوالې ټولنې سره د تعامل په اړه خبرې کړې دي.
خبر پاڼه زیاتوي، چې په دې ناسته کې لیندسي ویلي، بریتانیا په پام کې لري له افغانستان سره د همکاریو مسیر په تدریجي ډول له بشري مرستو څخه اقتصادي همکاریو ته واړوي.
د نوموړي په وینا، بریتانیا د افغانستان په ګډون له مخ پر ودې هېوادونو سره د خپلو اړیکو د پراختیا په چوکاټ کې د سوداګریزو اسانتیاوو او د تعرفو د کمولو له لارې د سوداګرۍ د پراختیا زمینه برابروي.
په دې ناسته کې عزیزي د تېرو پنځو کلونو د اقتصادي او ټولنیزو اقداماتو په اړه معلومات ورکړي او د صادراتو او سرانه عوایدو زیاتوالی، د نشهيي توکو د کښت او قاچاق پر وړاندې مبارزه، د روږدو کسانو درملنه او د معلولیت لرونکو کسانو ملاتړ یې د یادو اقداماتو له برخو بللي دي.