د اسلامي امارت د بهرنیو چارو وزارت د ویاند مرستیال ضیا احمد تکل په یوه غږیز فایل کې ویلي، چې په ملګرو ملتونو کې د اسلامي امارت له لوري ټاکل شوي استازي ته د افغانستان د څوکۍ نه سپارل د افغانستان پر خلکو ښکاره او غیر عادلانه ظلم دی.
نوموړي له ملګرو ملتونو غوښتي، چې دغه څوکۍ دې د اوسني افغان حکومت استازي ته وسپاري، ترڅو په نړيوالو کچه د افغان ملت له حقونو څخه دفاع وکړي.
ښاغلي تکل همداراز هیله څرګنده کړې چې د ملګرو ملتونو د عمومي اسامبلې په ۷۹مه غونډه کې به د افغانستان د شته واقعیتونو په نظر کې نیولو سره مثبتې پرېکړې وشي او له نړیوالې ټولنې سره به د ښه تعامل لپاره زمینه برابره شي.
په ورته وخت کې په قطر کې د اسلامي امارت د سیاسي دفتر مشر سهیل شاهین هم دغې غونډې ته د اسلامي امارت د استازي د نه بلنې پر پریکړې غبرګون وښود او ټینګار یې وکړ چې دغه پریکړه به د افغانستان او نړیوالې ټولنې تر منځ واټن لا زیات کړي.
د يادونې وړ ده چې د افغانستان اسلامي امارت د منفي تبلیغاتو په مقابل کې په وار وار په ډاګه کړې چې له نړیوالې ټولنې سره رغنده تعامل غواړي او د پرانستې او باعزته ډیپلوماسۍ غوښتنه کوي.
د سياسي چارو کارپوهان بيا په دې باور دي چې نړیواله ټولنه باید د فشار پر ځای د افغان ولس د ګټو د ملاتړ لپاره د خبرو او همکارۍ لاره غوره کړي.