د اسلامي امارت مرکزي وياند مولوي ذبیح الله مجاهد وايي چې د اسلامي امارت د مشرتابه د حکم پر اساس په يو شمير امارتي اداراتو نوې ټاکنې وشوې.
ښاغلی مجاهد وايي د ټولګټو وزارت د اوسپني پټلۍ مخکنی معین ملا بخت الرحمن شرافت، د عامي روغتیا وزارت د مالي او اداري معین په توګه وټاکل شو او د عامي روغتیا وزارت مخکنی مالي او اداري معین مولوي محمد اسحق صاحبزاده، د ټولګټو وزارت د اوسپني پټلۍ د معین په توګه ټاکل شوی.
همداراز وايي چې د کندوز ولایت مخکنی والي ملا نثار احمد نصرت، د کلیو د پراختیا او بیا رغونې وزارت د کلیو د ابادۍ د معین په توګه او د ۲۰۵ البدر قول اردو مخکنی قومندان ملا محمد خان دعوت، د کندوز ولایت د والي په توګه ټاکل شوی.
همداراز د هلمند ولایت ګریشک ولسوالۍ مخکنی ولسوال مولوي حیات الله مبارک، د غور ولایت د والي په توګه او د غور ولایت مخکنی والي ملا احمد شاه دیندوست، د ۲۰۵ البدر قول اردو د قومندان په توګه ټاکل شوی دی.
ښاغلی مجاهد زياتوي چې د کرنې اوبو لګولو او مالدارۍ وزارت د بشري سرچینو مخکنی رئیس مولوي عبدالولي اتقاني، د جوزجان ولایت د امنیه قومندان په توګه او د هلمند ولایت د موسی قلعه ولسوالۍ مخکنی امنیه قومندان ملا عبدالسلام حسیني، د کاپیسا ولایت د امنیه قومندان په توګه ټاکل شوی.
همدا راز د بادغیس ولایت د امنیه قومندانۍ مخکنی د امنیت آمر حاجي نور آقا حیدر، د غور ولایت د امنیه قومندان په توګه او د جوز جان ولایت مخکنی امنیه قومندان قاري حفیظ الله پهلوان، د باغیس ولایت د امنیه قومندانۍ د امنیت د آمر په توګه، او د ننګرهار ولایت د پوهنې مخکنی رئیس مولوي عزیز الله مصطفی، د همدې ولایت د والي د مرستیال په توګه ټاکل شوی.
ښاغلی مجاهد ډېروي چې د کاپیسا ولایت مخکنی امنیه قومندان حاجي محمد عثمان، د کرنې، اوبو لګولو او مالدارۍ وزارت د بشري سرچینو د رئیس په توګه، او د بهرنیو چارو وزارت مخکنی مالي او اداري معین مولوي رحمت الحق فضیل، د مرکزي دار الافتاء د غړي په توګه ټاکل شوي دي.
