د ایران فارس خبري اژانس د راپور لهمخې، د صهیونیستي رژیم او ایران ترمنځ په تېره ۱۲ ورځنۍ جګړه کې د دغه هېواد پولیسو او استخباراتي ځواکونو تر ۷۰۰ زیات اسرائیلي جاسوسان نیولي.
د خبر لهمخې، تر ټولو ډېر کسان د دغه هېواد په کرمانشاه، اصفهان، خوزستان، فارس او لرستان ولایتونو کې نیول شوي؛ خو په تهران کې د نیول شویو کسانو کره شمېره لا نه ده په ډاګه شوې.
د یادونې ده، چې د ایران او اسرائیلو ترمنځ د جګړې له پیل سره سم داسې راپورونه خپارل شول چې ګویا صهیونیستي استخباراتو پر مهمو اهدافو بریدونه له ډرونونو په استفادې د ایران له خاورې دننه ترسره کړي.
هېره دې نه وي، چې ایران نن سهار د ادریس، آزاد شجاعي او محمد رسول په نومونو د صهیونیستي رژیم د بهرني استخباراتو ادارې (موساد) درې جاسوسان په دار وځړول.