وروسته له هغه چې، په دې وروستيو کې هزاره فعالانو د مقاومت او نورو خيالي جبهو په کارکردګۍ او د دې جبهو د مشرانو په خيانتونو او ورانکاريو نيوکې او تبصرې وکړې؛ تازه د هزاره او تاجک سياسي فعالانو ترمنځ اختلافات د ټولنيزو رسنيو سرټکي ګرځېدلي.
د جمهوريت پر مهال د امنيت شورا سلاکار، داوود ناجي چې له هزاره قوم څخه دی په تازه څرګندونو کې پر تاجک مشرانو نيوکه کړې او ويلي یې دي «د طالبانو له لوري د خلکو د تلفاتو کچه لا هم د رباني او مسعود د واکمنۍ د دورې تلفاتو ته نه رسېږي.»
د نوموړي د دغو څرګندونو په ځواب کې تاجک سیاسي فعال سمیعالله سیحون په خپل فېسبوک پاڼه د پوښتنې په ډول لیکلي، چې داوود ناجي د چا په ډاډ دومره د تاجکانو د تاریخ، هویت او فرهنګ په اړه خبرې کوي.
هغه زياته کړې، چې که د داوود ناجي څرګندونې د رباني او مسعود پر ضد د انتقام اخیستو لپاره نه وي، نو د دې ډول څرګندونو موخه څه ده.
سیحون همداراز د لطيف پدرام د وروستيو څرګندونو دفاع کړې او په وينا یې، چې د نوموړي له لوري د تش په نوم جبهې د نیت او هدف په اړه د وضاحت غوښتنه کوي، د دې لپاره مطرح شوې، څو تاجک ځوانان يو ځل بيا د استخباراتي لوبو قرباني نه شي.