په ایران کې د مېشت مشهور سني عالم مولوي عبدالحمید وروستیو څرګندونو له افغانستانه بهر د مخالفو ډلو ټپلو د مشرانو او پلویانو غبرګونونه را پارولي دي او پر نوموړي یې بېلابېل تورونه لګولي، شخصیت وژنه یې کوي او په یو ډول هڅه کوي چې د هغه شخصیت، علمیت او وروستۍ واقعي او حقیقي څرګندونې تر پوښتنې لاندې راولي.
مولوي عبدالحمید په دې وروستیو کې افغانستان ته سفر درلود چې تود هرکلی یې وشو او دغه راز نوموړي په افغانستان کې له شته امنیت او ثبات خوښي وښوده او زیاته یې کړه چې افغانستان په خپل معاصر تاریخ کې د لومړي ځل لپاره بشپړ امنیت او ثبات ته رسېدلی، هر څوک پکې په ارامۍ او کرارۍ ژوند ته دوام ورکوي او د هر چا حقونه پکې خوندي دي.
له افغانستانه بهر مېشتې مخالفې ډلې ټپلې، د هغوی غړي او ملاتړي چې همېشه یې خپله بقا د افغانستان په ورانۍ، بربادۍ او نا امنۍ کې پاللې ده، تل هڅه کوي چې د خپلو ناسمو او زهرجنو تبلیغاتو له لارې د افغانستان وضعیت ناسم وښيي او په دې ډول خپله بقا او شومې موخې تضمین کړي. په دې لړ کې دوی د هر هغه چا غندنه او شخصیت وژنه کوي چې د افغانستان د وضعیت په اړه کره او واقعي تصویر وړاندې کوي.
د همدې شخصیت وژنو او له واقعیت او حقیقت څخه د اذهانو د بدلولو په دوام، د مقاومت په نوم د بهر مېشتې ډلې ټپلې مشرانو او پلویانو په ټولنیزو رسنیو کې د متدین عالم مولوي عبدالحمید د شخصیت وژنې او غندنې لړۍ روانه کړې ده او پر نوموړي بېلابېل تورونه لګوي. تر دې وړاندې هم هغو بهرنیو سیلانیانو چې افغانستان ته یې سفر کړی، په دغه هېواد کې یې د امنیت، سولې او ارامۍ په اړه خبرې کړي، د همدې مخالفو ډلو او په ټولنیزو رسنیو کې د دوی اړوند اصلي او جعلي ادرسونو او دغه راز د رسنیو په نوم د دوی د تبلیغاتي ادرسونو تر پراخو بریدونو لاندې راغلي دي.
دا هڅې د مخالفو ډلو د ذلت، کمزورۍ او اخلاقي زوال اوج ښيي، دوی په پیل کې هڅه وکړه چې له بېلابېلو لارو چارو شته امنیت وګواښي، ګډوډي جوړه کړي، بهرنۍ پروژې او پلانونه عملي کړي او افغانستان د خپلو لوبو پر میدان بدل کړي، خو کله چې دوی په دې هڅو کې ناکام شول، د خلکو له خوا ورټل شول او د دوی د پخوانیو ملاتړو اعتبار یې له لاسه ورکړ، نو یې په ټولنیزو رسنیو کې دغه ډول منفي تبلیغاتو او پروپاګند ته مخه کړه.
خو د افغانستان واقعیتونه، حقیقتونه، امنیت او ثبات هغه څه نه دی چې په دا ډول کمزورو هڅو دې اغېزمن شي، دا ډلې لکه څه ډول چې په متواتره توګه په نورو برخو کې ماتې شوې، بدنامې شوې او تورې څهرې یې ولس او نړۍ ته ښکاره شوې، همداسې به یې د پروپاګند او منفي تبلیغاتو ته لړۍ هم ناکامېږي او هېڅ څه به ترې ترلاسه نه شي کړی. دا کمزورې او ناکامې هڅې، شخصیت وژنې، بې ځایه غندنې او منفي زهرجن تبلیغات د مخالفو ډلو د اخلاقي او معنوي زوال ښکارندوی دي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.