د افغانستان دفاع وزارت د یوې اعلامیې په خپرولو سره ویلي، چې هوایي ځواک یې تېره شپه په بلوچستان او خیبر پښتونخوا ایالتونو کې د داعشیانو او اربکیانو مرکزونه په نښه کړي دي.
وزارت زیاته کړې، له دغو مرکزونو د ځینو «شریرو استخباراتي کړيو» په مرسته د افغانستان په خاوره بریدونه پلان کېدل او په تېر کې ترې یو شمېر بریدونه ترسره شوي هم وو.
دفاع وزارت ویلي، چې دا بریدونه چې د بلوچستان ایالت د قلعه عبدالله ولسوالۍ په ګلستان او د چاغي ولسوالۍ د ګردي ځنګل په شکر آب سیمو او د خیبر پښتونخوا په قمبرخېلو سیمه کې ترسره شوي.
دفاع وزارت ویلي، ترسره شویو بریدونو کې مهم او مطلوب اهداف په نښه شوي دي.
یاد وزارت وړاندې خبرداری ورکړی، چې له دې وروسته به افغانستان د خپل امنیت او ثبات پر وړاندې هیڅ ډول ګواښ او تهدید ته وخت ورنکړي او له خپلو ټولو امکاناتو څخه په استفادې به یې په نطفه کې له منځه یوسي.