د هېواد د اطلاعاتو او کلتور وزارت مرستیال، مهاجر فراهي خیبر پښتونخوا او بلوچستان کې د داعش او اربکیانو پر مرکزونو د افغان هوایي ځواک د تېرې شپې عملیاتو ته په اشارې ویلي، چې د افغانستان د امنیت اخلالوونکي چې هر ځای وي، زموږ مشروع اهداف دي.
ښاغلي فراهی زیاته کړې، چې افغان دفاعي او امنیتي ځواکونه به هر هغه هڅه په نطفه کې خنثیٰ کوي، چې د هېواد د پرمختګ، اقتصادي بیا رغونې او ټولنیزې هوساینې پر وړاندې خنډ ایجادوي.
ښاغلی فراهي دا څرګندونې داسې مهال کوي چې، د افغانستان هوایي ځواکونو تېره شپه د پاکستان پوځي رژیم تر کنټرول لاندې د خیبر پښتونخوا او بلوچستان په درې بېلابېلو سیمو کې د پرځول شوي جمهوریت پر پاتې شونو (اربکیانو) او داعش وسلهوالو دقیق بریدونه وکړل.
د هېواد دفاع وزارت په یوه خبرپاڼه کې وویل، چې دغو بریدونو کې ټاکل شوي اهداف په دقت په نښه شوي دي.