د عامې روغتیا وزارت مسئولینو، نن شنبه د حکومت د اطلاعاتو او رسنیو مرکز کې د امارتي ادارو د یو کلنو لاسته راوړنو د تشریح پروګرام کې د یوه خبري کنفرانس پر مهال، د دغه وزارت د یوکلنو کړنو او لاسته راوړنو راپور له رسنیو سره، شریک کړ.
د عامې روغتیا وزارت مسئولینو په دې خبري کنفرانس کې، د پنځه کلن پلان چمتو کول، لابراتوارونو او تشخصیه کلینیکونو ته د اعتبار ورکولو مسودې چمتو کول او د تقنیني اسنادو درجه بندي ، ۳۴۸۹ روغتیایي کار کوونکو ته د فعالیت جوازونه ورکول، په ۳۴ ولایتونو کې بندیانو ته د روغتیایي خدمتونو وړاندې کول، له داخلي تولیداتو څخه د ملاتړ په موخه، د ۱۰۵۶ قلمه مختلف النوعه درملو تایید، د ۱۵۰۶ نویو ډاکټرانو ثبتول او د طبي سرغړونو او شکایتونو ۱۴ قضیو ته رسېدنه؛ په تېر کال کې د روغتیا وزارت د عمده فعالیتونو په توګه یاد کړل.
د وزارت مسئولینو زیاته کړه، چې په ټولو خصوصي انسټیټوټونو کې د درسي نصاب معیاري کول، درې کلونو ته د قابلګۍ د دوه کلنې دورې لوړول، د طبي علومو په خصوصي انسټیټوټونو کې د ۲۷۶۴۲ تنه محصلینو شاملول، د روغتیا برخه کې ۶۲۰۳۱ تنو ته د تربیتي پروګرام جوړول او د طبي علومو له انسټیټوټونو څخه د ۱۶۰۸ تنه محصلینو فراغت؛ په تېر یوه کال کې د وزارت له نورو فعالیتونو څخه دي.
د مسئولینو په وینا، په تېر کال کې د هیواد په کچه، د ۴۲۱۲ روغتیایي مرکزونو له لارې، ۸۷۹۸۷۱۰ سراپا، ۱۹۸۶۶۵۰ داخل بستر، ۶۵۳۰۰ هیمودیالیز او ۳۱۶۱۴ سرطاني ناروغیو د درملنې خدمتونه وړاندې شوي دي. دغه راز د ۲۳۶۹۲ روږدو کسانو درملنه شوې او په هېواد کې د وروستیو زلزلو له امله ۲۲ زره زیانمنو ته هم روغتیایي او روان درماني خدمتونه وړاندې شوي دي.
همدارنګه، ماشومانو ته د څه باندې ۸.۸ میلیونه ویټامین A کپسولو وېش، ماشومانو او زلمیو ته د ۱۵۵۷۳۴۴ فولیک اسید او اوسپنې ټابلېټو وېش، ماشومانو ته د ۱۸۶۱۲۲۱ مغذي پوډرو(MNP) وېش، په ۱۴ ولایتونو کې ۲۷۰۳۸ تنه راستنو شویو ته د واکسین تطبیق او درملنه، ۲۵۸۱۷۰ تنه کوچیانو ته د روغتیایي خدمتونو وړاندې کول او ۶۸۳۱ معلولینو ته د فزیکي تجهیزاتو برابرول؛ په تېر یوه کال کې د وزارت له نورو مهمو فعالیتونو څخه دي.
د وزارت مسئولینو د خپلو خبرو په دوام وویل، چې په تېر کال کې د واکسین د تطبیق کچه له ۶۵ څخه ۸۰ سلنې ته لوړه شوې او په ټولیز ډول ۸۵۹۹۷۰ مېندو او ماشومانو ته واکسین تطبیق شوی دی.
د مسئولینو د معلوماتو له مخې، په تېر کال کې ۲۵۳۰۲ قلمه درملو او روغتیایي محصولاتو د واردېدو اجازه ترلاسه کړې، له کورنیو تولیداتو څخه ۲۳۱۶ قلمه درمل بازار ته وړاندې شوي، د درملو د تولید ۱۵ فابریکو، د درملو د تورید ۱۵۱ شرکتونو او ۱۷۹ عمده پلورنځیو او ۲۴۶۸ فارمسسټانو ته د فعالیت جوازونه ورکړل شوي دي.
همداراز، افغانستان د سیرومو د تولید برخه کې خودکفا شوی او په تېر کال کې یې په زیاته اندازه سیرومونه عربي هېوادونو ته صادر کړي دي. د دې تر څنګ، په تېر کال کې د هېواد په کچه، ۱۶۱۰ ټنه، تاریخ تېر درمل، روغتیایي او خوراکي محصولات هم له منځه وړل شوي دي.
د روغتیایي خدمتونو له وړاندې کوونکو ۱۸۰ موسسو سره د همکارۍ تفاهم لیکونو لاسلیکول او د روغتیا سکتور کې د فعاله ۱۸۴ موسسو ثبتول؛ په تېر کال کې د وزارت له نورو اقداماتو څخه دي.
د وزارت معلوماتو له مخې، د ولسوالیو په کچه د روغتیایي مرکزونو رامنځته کول، په لرې پرتو سیمو کې د روغتیایي خدمتونو وړاندې کولو د کیفیت ښه کول، د جمهوریت روغتون تجهیزول، د ساري ناروغیو کنترول، د ماشومانو د فلج ناروغۍ له منځه وړل او د ظرفیت لوړولو د پروګرامونو په لار اچول؛ په روان کال کې د روغتیا وزارت له مهمو لومړیتوبونو څخه دي.