د ټولګټو چارو وزارت ویلي، چې د هېواد د اقتصادي ودې او بیارغونې د پلان له مخې، د څه باندې ۴۵۱ میلیونه افغانیو په لګښت د پنجشېر-تخار سړک د رغونې چارې پیل شوې.
سرچینې زیاته کړې، چې دغه سړک ۲۵ کیلومتره اوږدوالی لري، چې د پنجشېر ولایت د پریان ولسوالۍ له خاواک سیمې څخه پیل او د تخار ولایت تر ورسج ولسوالۍ پورې رسېږي.
د ټولګټو وزارت په وینا، د یاد سړک د کار په جریان کې به د سیمې یو شمېر اوسېدونکو ته کار زمینه برابره شي او په بشپړېدو سره به یې د شمال ختیځ ولایتونو او کابل ترمنځ واټن راکم شي.
یاد وزارت د تخار-پنجشېر سړک د سالنګ بدیله لار بللې او زیاته کړې یې ده، چې ورسره به د سوداګرۍ او اقتصادي فعالیتونو د پراختیا ترڅنګ د خلکو تګ راتګ اسانه او چټک شي.