د پاکستان حکومت چې همېشه یې د نورو د تخریب سیاست خپل کړی او خپله بقا یې د ګاونډیو هېوادونو په بربادۍ کې لټولې، تازه یې په اسلام آباد کې د بشر او ښځو د حقونو د ملاتړ په موخه یو کنفرانس جوړ کړی دی.
دغه کنفرانس چې په ظاهره د ښځو د حقونو او زده کړو د ملاتړ په موخه جوړ شوی، په حقیقت کې یې تر شا یو پټ سیاسي هدف چې د افغانستان د اسلامي نظام د حیثیت تخریب او د خپلو سیاسي ګټو ترلاسه کول دي؛ پروت دی. په کنفرانس کې د پاکستان دغه چل او دوکه د هیچا له سترګو او غوږونو پټ پاتې نه شو او ټولو ته څرګنده شوه چې پاکستان غواړي اوبه خړې او ماهیان ونیسي.
خو دا پوښتنې د هر چا په ذهن کې را ولاړیږي چې آیا د پاکستان حکومت به وکړای شي د چل ول له لارې د افغانستان د اسلامي نظام حیثیت ته زیان ورسوي؟ آیا له خپلو کورنیو ستونزو څخه د خلکو پام بل لوري ته اړولی شي؟ آیا د خپلو پوځيانو جنایتونه په ورته کنفرانسونو پټولای شي؟ دا هغه پوښتنې دي چې روښانه ځواب غواړي او له شک پرته چې ځواب یې منفي دی.
د پاکستان پوځ چې د دولت واګې یې په لاس کې دي، په دې ښه پوهېږي چې د «تفرقه واچوه او حکومت وکړه» سیاست چې له انګریزي استعمار څخه یې په میراث اخیستی، په افغانستان کې نور اغېز نشي درلودلی او اوس حالات بدل شوي، ځکه د افغانستان سرپرست حکومت د پاکستان د پوځ او دیپلوماتیکو آدرسونو په وړاندې برلاسی دی. همدا لامل دی چې د پاکستان سیاستوال سخت وارخطا شوي، کله د افغانستان په ضد کنفرانسونه جوړوي، کله یې د دفاع وزیر له سپکې او سپورې ژبې په کار اخیستلو او د افغانستان په ملي او تاریخي شخصیتونو حملې کوي.
پاکستان چې د بشر د حقونو په برخه کې تیاره مخینه لري، څنګه کولی شي د بشر د حقونو او په ځانګړې توګه د ښځو د حقونو د دفاع لاپې وولي؟ دغه هېواد د خپل تاسیس په څو کلونو کې، مسلمانان همېشه د خپلو سیاسي اهدافو لپاره د ډال په توګه کارولي دي.
که د پاکستان له جوړېدو پېړۍ هم تېرې شي او که بالفرض حکومت یې د اصلاح او اسلامي لارې په لور ګام هم واخلي، له مظلومې مسلمانې خور عافیه صدیقي سره کړې جفا یې هېڅکله په لمن تور داغ نشي پاکولای. همدا یوه توره نښه بسنه کوي چې د پاکستان حکومت باطل، د ښځو. او ضد وښيي.
هو، د دې کنفرانس له ګډونوالو دې دا پوښتنه وشي چې آیا په دې کنفرانس کې یې د بشر او ښځو د حقونو د دفاع په موخه ریښتینې هڅې کړي دي؟ ایا دوی د هغو بلوڅو او پښتنو ښځو او ماشومانو چې د پاکستان د پوځ د ظلم او جنایتونو ښکار دي؛ په حالت خبر نه دي؟ ایا دوی نه پوهېږي چې په دې هېواد کې بې ګناه مسلمانان او انسانان د پاکستان د پوځ د ځپونکو سیاستونو قرباني دي؟، ایا د بلوڅو او پښتنو ښځې او ماشومان انسانان نه دي او د بشر په ډله کې نه راځي؟
دغه کنفرانس په داسې حال کې جوړ شوی چې د فلسطین په ښځو او ماشومانو د اسرائيلو ظلمونو او جنایتونو ټوله نړۍ ولړزوله، خو همدې غونډې او کسانو د فلسطین د مظلوم ملت او ښځو لپاره چې هره ورځ په اورونو کبابیږي، هېڅکله ریښتینې غږ نه دی اوچت کړی.
ایا د فلسطین د ښځو او ماشومانو کریږې او فریاد د دوی غوږونو ته نه دی رسېدلی؟ او ولې د دې کنفرانس هېڅ ګډونوال د عافیه صدیقي په اړه د پاکستان د جنایتونو پوښتنه ونکړه؟ ولې له دې کسانو هېڅ کس له پاکستان څخه دا غوښتنه ونه کړه چې د نورو لپاره دسیسې جوړولو پر ځای دې د عافیه صدیقي په څېر کسانو د برخلیک ځواب دې ووايي؟
د پاکستان د حکومت دا ټولې شوم کړنې دا په ډاګه کوي چې د دې حکومت اصلي موخه د ښځو یا د بشر د حقونو دفاع نده، بلکې یوازې او یواځې د افغانستان د اسلامي حکومت تخریبول غواړي او بس.
هغه کسان چې په دې کنفرانس کې یې برخه اخیستې، د اسلامي امت د مرستې او خواخوږۍ لپاره نه، بلکې د اسلامي امت د تخریب لپاره سره راټول شوي دي. دا کسان، که د اسلامي نړۍ لوړپوړي علماء دي او که د پاکستان د استخباراتي ادارو نور لاسپوڅي، یوازې په خپلو سیاسي ګټو پسې دي او هېڅکله به د مسلمانانو د حقایقو او ریښتینو حقونو په اړه خولې خلاصې نه کړي.
نو د افغان ملت او نورو اسلامي ملتونو لپاره اړینه ده چې د پاکستان دا تخریبي اعمال په بشپړه هوښیارۍ او ځیرکتیا سره وپېژني او پر وړاندې یې اقدام وکړي. د پاکستان مزدور پوځ باید درک کړي چې یواځې د بشپړ اسلامي نظام له لارې بریالی کېدای شي، نه د دغه چلونو او تخریبي سیاستونو له لارې چې په پای کې به یې زیان هم خپل ځان ته ورسېږي.