د مهاجرینو او راستنېدونکو چارو وزارت په یوه خبرپاڼه کې ویلي، چې د روانې اوونۍ په ترڅ کې ۱۰۹۹ افغان کډوال، چې د پاکستان په بېلابېلو زندانونو کې بندیان وو، تر خوشې کېدو وروسته د ننګرهار او کندهار ولایتونو له لارې هېواد ته راستانه شوي.
د خبرپاڼې په وینا، له دغو کسانو څخه ۸۹۶ تنه د تورخم او ۲۰۳ تنه د سپین بولدک له لارې افغانستان ته داخل شوي دي. په راستانه شویو کې کورنۍ او مجرد کسان شامل دي، چې د بېلابېلو لاملونو له امله په پاکستان کې زنداني شوي وو.
خبرپاڼه زیاتوي، راستانه شوي کسان د لېږد په امریتونو کې تر ثبت او د بشري مرستو له ترلاسه کولو وروسته خپلو اصلي مېنو ته لېږدول شوي دي.
د مهاجرینو او راستنېدونکو چارو وزارت ټینګار کړی، چې د افغان حکومت په همغږۍ به د راستنېدونکو کډوالو ملاتړ ته دوام ورکړي او د بندي کډوالو ازادېدل او هېواد ته راستنېدل د دوی لپاره د نوي ژوند د پیل یو فرصت ګڼي.