د امر بالمعروف او نهې عن المنکر وزارت سرپرست شيخ محمد خالد حنفي په سرپل ولایت کې په یوې ناسته کې د دغه وزارت د تازه توشیح شوي قانون په اړه د یوناما او نورو بنسټونو پر دریځ سخته نیوکه کړې ده.
ښاغلي حنفي په دغې غونډه کې چې، د سیمهییزو مسوولانو، قومي مشرانو، دیني عالمانو او د دغه وزارت د محتسبینو په ګډون جوړه شوې وه، وايي د یوناما او نورو بنسټونو څرګندونې بې ارزښته دي او زیاتوي چې، اسلامي امارت له نړۍ سره د اسلامي قوانینو په رڼا کې تعامل ته چمتو دی.
ښاغلي حنفي زياته کړې چې، حجاب او د شرعي حدودو پلي کول زموږ سره کرښه ده او په دې برخه کې د هېچا فرمایش نهمنل کېږي. ښاغلي حنفي وويل:«که چېرې اسلامي امارت له نړۍ سره تعامل کوي، د شریعت د چوکاټ مطابق یې کوي، او ان شاءالله هېڅکله به د شریعت پر خلاف کړنه ونهکړي او په وينا یې زموږ موخه د اسلامي شریعت پر مټ نظام دی.»
همدارنګه ښاغلي حنفي د امر بالمعروف او نهې عنالمنکر وزارت له محتسبینو غوښتي چې، د اسلامي امارت له لوري تازه توشیح شوی قانون په بشپړ ډول عملي کړي.
بلخوا په دغې غونډه کې، د سرپل سیمهییز مسوولان او ديني عالمان د تازه توشیح شوي قانون پر عملي کېدو، له خلکو سره پر ښه چلند او همداراز د افغانستان په کورنیو چارو کې د بشري حقونو بنسټونو پر نه لاسوهنې ټینګار کړی دی.