د امر بالمعروف، نهی عن المنکر او شکایتونو اورېدلو وزارت په یوه خبرپاڼه کې ویلي، چې په شپږو ولایتونو کې د میراث، مهر او نفقې په برخو کې د ۱۷ ښځو شرعي حقوق یې تأمین کړي دي.
د دغه وزارت د معلوماتو له مخې، یادو قضیو ته په بلخ، سمنګان، پروان، غزني، پکتیا او تخار ولایتونو کې د ښځینه مراجعینو له شکایتونو وروسته، د اسلامي شریعت د احکامو او د شکایتونو د اورېدلو د اصولو او طرزالعملونو له مخې رسیدګي شوې ده.
مسؤولین وايي، د قضیو له هر اړخیزې څېړنې وروسته د ښځو شرعي حقوق په میراث، مهر او نفقه کې تثبیت شوي او هغه حقوق چې د شرعي احکامو له مخې ورسره تعلق درلود، بېرته ورکړل شوي دي.
د یادونې وړ ده، چې د وزارت د معلوماتو له مخې، د روان کال په زمري میاشت کې هم له سلو څخه زیاتو ښځو د میراث، مهر او نفقې په برخو کې خپل شرعي حقوق ترلاسه کړي دي.