لسمه برخه
د باغیانو په ګټه او د نورو پر ضد د منفي تبلیغاتو مخنیوی
هغه کسان چې په حقه نه دي او له واقعیتونو څخه په لیرې واټن کې ژوند کوي، همېشه هڅه کوي چې د ناپوهۍ د لارې لټوونکو کسانو مزل د دوی تر درشل ورسیږي، د خپلو فکري دامونو ښکار او ذهنونه یې ور مسموم کړي.
دا کسان تر یوې مودې نوي جذب شوي او راغلي کسان په هر چل او دوکې د ځان ترڅنګ ساتي، د دوی پر خامو فکرونو د خپلو وژونکو فکرونو زهر لا نور شیندي او پیاوړي کوي یې.
خو دا هڅې یې هېڅکله د پام وړ پایله نه لري، ځکه هر هغه څه چې له حقیقت او واقعیت څخه لیرې وي، که هر څومره ښایسته او زړه راښکونکي الفاظ ورته وکارول شي، بیا هم نه شي کولای د چا فکر قانع، یو څوک د ځان تابع، یو تیاره زندان د ښکلې ماڼۍ او زهر د شاتو په بڼه وښيي.
له همدې امله، د بغاوت کوونکو په وړاندې یوه مهمه مبارزه دا ده چې د ناسمو او ناوړه تبلیغاتو له لارې د ځوان نسل د فکرونو د زهرجن کولو مخنیوی یې وشي. باید هغوی ته اجازه ورنه کړل شي چې د ملت او خلکو مینځ ته د ښکار په موخه راووځي او نور د خپلو ناوړه موخو لپاره وکاروي.
د دې لپاره چې ځان معصوم او پاک وښيي، دوی په دې تبلیغاتي ډګر کې په خپل ټول توان هڅه کوي چې پر حکومت بریدونه وکړي، خپلې ټولې بدبختۍ او مصیبتونه د چارواکو پر اوږو ور واچوي، د مظلومیت پرده خوره کړي، عامه ذهنیت مغشوش او د پروپاګند له لارې ځان ته بشري او فکري ځواک راجمع کړي. بیا به دوی په ډاډه زړه له میدان لیرې د سیل بینو په توګه ورته ناست وي، نور به یې په خپلو کې سره اچولي او دوی به یې ننداره کوي.
له همدې کبله باید د مخنیوي ټول تدابیر ونیول شي، څو دغه ډارن او تښتېدلي عناصر ونشي کولی په هېواد کې د خپلو ګټو لپاره فعالیتونه وکړي او د خلکو، په ځانګړي ډول د ځوانانو فکرونه ښکار او تخریب کړي.
دا چې نننۍ نړۍ د آزاد بازار، رسنیو او مطبوعاتو د سیالۍ ډګر دی، هر څوک چې پکې بریالی شو او مډال یې واخیست، په ډیرې اسانۍ سره کولی شي ځان اتل او قهرمان وښيي، نورو ته د شهامت نمونه وګرځي او خپل رقیبان د سیالۍ له ډګر څخه وباسي.
دا هر څه کولی شي واقعیتونه بدل او سرچپه وښيي، له نیکو بد او له بدو نیکان جوړ کړي، خلکو ته زهر په طلایي جام کې له یوه خواږه خوند او ذایقې سره وړاندې کړي.
خو د حکومت د یووالي، منظمې ستراتیژۍ او د هېواد د نامحدودو امکاناتو پر وړاندې، د دوی سرګردانې انفرادي او ګډوډې هڅې به هیڅ بریا او پایله له ځان سره ونه لري.
یوازې همدا بسنه کوي چې د دوی پر وړاندې د مبارزې لپاره یو منظم فکر، پلان او برنامه شتون ولري، د باغیانو د ريښو وچولو او له فعالیت څخه د غورځولو لپاره ځانګړې هڅې وشي.
یادؤنه: په هندوکش غږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکش غږ توافق ورسره شرط نه دی.