دوه ورځې وړاندې په امریکا کې د پرځېدلي جمهوریت یو ډیپلوماټ “د طالبانو ظهور، جګړې او روایت” په اړه سپېس جوړ کړی و، په یاد سپېس کې د پرځېدلي جمهوریت د ارشاد، حج او اوقافو وروستی وزیر محمد قاسم حلیمي چې له خپل نوم سره ډېری وخت مولانا(!) هم اضافه کوي؛ خاص مېلمه و.
حلیمي چې تېر شل کاله د طالبانو مخالف پاتې شوی دی، د خپل وروستي مسؤلیت پر مهال یې له ټولو اخلاقي پولو پښه اړوله او په خورا پوچو الفاظو به یې عموماً علماء، طالبان او مخور ښکنځل؛ د ښکنځلو، دروغو، چل او فرېب دغه مخکښې څهرې تازه پر طالبانو هم بې بنسټه تورونه پورې کړي دي.
حلیمي په سپېس کې لومړی په خورا سپین سترګۍ ځان د طالبانو ویاند ونوماوه او د خپل ژوند د دروغو نیمګړی داستان یې وړاندې کړ؛ د دې لپاره چې ځان له طالبانو سره اشنا او نږدې څهره وښیي، ادعا یې وکړه چې د طالبانو د لومړنۍ واکمنۍ له سقوط وروسته، نوموړی تر عبدالحي مطمئن مخکې د حامد آغا په نوم د طالبانو ویاند و. په داسې حال کې چې د طالبانو د لومړني سقوط وروسته د طالبانو ویاند د اطلاعات او کلتور وزارت اوسنی معین قدرت الله جمال و.
حلیمي تر سقوط وروسته ډېر لږ وخت له طالبانو سره یو ځای شو، خو هماغه مهال هم یو مشکوک کس و او باور نه پرې کېده، له همدې امله یې لږ وخت فرهنګي فعالیتونه وکړل، خو بیرته تسلیم شو.
حلیمي د پرځېدلي جمهوریت پر مهال په بېلابېلو موقفونو کار وکړ، خو په خپل وروستي موقف کې، چې د ارشاد، حج او اوقافو وزیر و، په خورا پوچو الفاظو یې د علماوو علمیت او د طالبانو جګړه ننګوله؛ نوموړي ته دنده ورکړل شوې وه، چې عام وګړي پر علماوو بې باوره کړي او مذهبي کړکېچ رامنځ ته کړي. نوموړي د پرځېدلي جمهوریت د مشروع ثابتولو په نوم علماء په جاهلینو مخاطب کول او له هغوی سره په معقولو دلایلو د مباحثې پر ځای یې ښکنځل ورته کول.
قاسم حلیمي چې پر یو بل اکاونټ په ټویټر کې بیا ځل را څرګند شوی دی، د دروغو په ویلو او بې بنسټه تورونو لګولو سره غواړي د پلورل شویو سیاسیونو په قطار کې ځان مطرح کړي، د شر او فساد صف تقویه کړي، د دیني نصوصو او روایاتو په ناسم تعبیر د طالبانو په وړاندې مبارزه وکړي او د یوې جاسوسي څهرې په توګه وپېرل شي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.