په وروستیو هغه څرګندونو کې چې د مقاومت جبهې د سياسي دفتر مشر عبدالله خنجاني له يوې خصوصي رسنۍ سره کړې دي، دا مسئله نوره هم روښانه کړل چې دغه جبهه د افغانستان د سولې، ثبات او ملي یووالي لپاره نه، بلکې د جګړې، بهرنيو یرغلګرو د بېرته را ستنېدو او د قومونو ترمنځ د تفرقې د ایجاد لپاره کار کوي.
خنجاني ټينګار کړی چې امريکا بايد بېرته بګرام ته راشي، خو د سرپرست حکومت پر ځای له مقاومت جبهې سره د تعامل له لارې. دې غوښتنې بیا ځل څرګنده کړل چې مقاومت جبهه لا هم له بهرنيو یرغلګرو څخه د بیا اشغال تمه لري او د افغانستان خپلواکي او ملي حاکميت هېڅ ارزښت نه ورته لري.
سربېره پر دې، خنجاني ادعا کړې چې باګرام د تاجیکانو د امنیتي او جغرافیایي حوزې برخه ده. دا ډول څرګندونې چې جغرافیه په قومي بنسټ ویشي، د خطرناکو قومي تعصباتو دروازې خلاصوي او له ملي وحدت سره ښکاره دښمني ده. دا واضحه ده چې افغانستان د یو واحد ملت نوم دی، نه د قومونو ټوټه شوې نقشه. د مقاومت جبهې د دريځ دا ډول اظهار د هغو خلکو لپاره چې دا جبهه ملي بولي خبرداری او پر مخ ویښوونکی ګوزار دی.
دا جبهه چې ځان د ډیموکراټیکو ارزښتونو پلوې معرفي کوي، په عمل کې د ملي ارزښتونو، خپلواکۍ، سولې او عدالت خلاف د جګړې دوام ته لمن وهي. د هغوی د وسلهوال فعاليت لاپې، د سياسي حل پر ځای پر نظامي لارو تمرکز، د اشغال بیا را ګرځېدل او د بهرنیانو ملاتړ ته لېوالتیا دا ښيي چې دوی د يوه خپلواک او سولهييز افغانستان پر ځای د يوه جګړهځپلي، تقسيم شوي او اشغال شوي افغانستان طرفدار دي.
د مقاومت جبهې دا ادعا چې دوی او د سرپرست حکومت نورې مخالفې ډلې د باور وړ متحدين دي، له ملت سره هېڅ تړاو نه لري، ځکه چې ملت جګړه نه غواړي، ملت سوله او ثبات غواړي. له همدې امله، دا جبهه نه ملي ده، نه د افغانستان د ارزښتونو استازيتوب کوي، بلکې د خپلو محدودو سياسي او شخصي اهدافو لپاره د افغانستان د ولسونو په وينو لوبه کول غواړي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.