د عامې روغتیا وزارت وایي، د دغه وزارت سرپرست مولوي نور جلال جلالي افغانستان لپاره د روغتیا نړیوال سازمان له مشر ایډوین سنیزا سلاوډر او د ختیځې مدیترانې حوزې د پولیو د لهمنځه وړلو مسئول ډاکټر حامد جعفري سره کتلي.
د یاد وزارت په وینا، دې کتنه کې د روزنیزو سمینارونو په برابرېدو، د پولیو واکسین غوره تطبیق، د بېرته راستنېدونکو هېوادوالو لپاره د روغتیايي خدمتونو او اسانتیاوو په رامنځته کېدو، روغتونونو لپاره د طبي تجهیزاتو پر برابرېدو، د کتلوي معافیت جوړې شوې پالیسۍ د تطبیق او د سرطان ناروغانو د درملنې برخه کې په همکاریو خبرې شوې دي.
دعامې روغتیا وزارت سرپرست په خپلو خبرو کې له ساري ناروغیو سره مبارزه د عامې روغتیا وزارت لومړیتوب یاد کړی او د یاد سازمان له مسئولینو یې غوښتي، چې تورخم کې بېرته راستنېدونکو هېوادوالو ته د اسانتیاوو او هرات کې د تلسیمیا ناروغانو درملنې لپاره د جوړ شوي روغتون په تجهیز کې همکارۍ وکړي.
له بل لوري د روغتیا نړیوال سازمان استازو، د خپلو ترسره شویو فعالیتونو په اړه د معلوماتو ورکولو سربېره په یادو برخو کې د بشپړې همکارۍ ډاډ ورکړی دی.