د افغانستان د پاسپورټ ریاست د یو شمېر هغو رسنیو اوازې رد کړي، چې گوندې د پاسپورټ رئیس پاسوال عبدالکریم حسیب په کندهار کې نیول شوی دی.
یاد ریاست له لوري په خپره شوې خبرپاڼه کې ویل شوي، له څو ورځو راهیسې ځینې اړخونه ادعاوې کوي، چې گنې د پاسپورټ رئیس نیول شوی.: «واقعیت دا دی چې څه موده وړاندې د ننگرهار په باریکاب کې د ځمکو په تړاو لاریونونه وشول، چې د همدې موضوع د وضاحت لپاره ښاغلی حسیب او د کورنیو چارو او ملي دفاع وزارت یو شمېر مسوولین د مشرتابه مقام ته غوښتل شوي دي.»
د خبرپاڼې له مخې، د پاسپورټ رياست اړوند داسې هېڅ کومه خبره نهشته چې د تشویش وړ دې وي.:«د پاسپورټ چارې به په عادي ډول روانې دي او په دې تړاو هېڅ کومه ستونزه او اندېښنه نهشته.»
له تېرو څو ورځو راهیسې یو شمېر رسنیو داسې راپورونه خپاره کړي وو، چې گوندې د پاسپورټ رئیس نیول شوی دی؛ خو د نیول کېدو په تړاو یې څه نه وايي.