د پيسو نړيوال صندوق (IMF) د حکومتولۍ او فساد د تشخیص ارزونه (GCDA) کې ویلي، چې پاکستاني حکومت په وروستيو څو کلونو کې له ژور اداري فساد سره مخ دی او همدا فساد د دولتي بنسټونو د سیستماتيکو کمزوریو لامل شوی دی.
د پيسو نړيوال صندوق زياته کړې، چې تېر دوه کاله د پاکستاني حکومت په اداراتو کې ۵۳۰۰ ميليارده کلدارې شاوخوا اداري فساد شوی دی.
د فساد لاملونه د عامو خلکو له لوري د ساده حکومتي خدماتو په بدل کې دولتي مامورینو ته پیسې ورکول او د حکومتي مشرانو له لوري په لويو پروژو کې غلا ښودل شوي دي.
په راپور کې ټینګار شوی چې پاکستاني حکومت باید د مهمو دولتي ادارو لپاره ځانګړي امتیازونه ختم کړي، د ځانګړې پانګونې د اسانتیا شورا (SIFC) چارو کې شفافیت رامنځته کړي او د حکومت مالي واکونه د پارلمان تر جدي څار لاندې راولي.
دغه بنسټ ويلي، که پاکستان په راتلونکو شپږو میاشتو کې ځينې اصلاحات پیل کړي، نو ښايي په راتلونکو پنځو کلونو کې د فساد کچه راکمه او وضعيت ښه شي.