د پنجشېر ولايت مقام رسنيز دفتر وايي، د دې ولايت د لوړو زده کړو موسسې د پوهنتون کچې ته په ارتقا موندلو سره د پنجشېر قومي مشرانو او متنفذینو په منجهور ساحه کې د پوهنتون لپاره نږدې ۱۰۰ جریبه ځمکه وقف کړه.
سرچينه وايي، په همدې تړاو جوړې شوې ناسته کې د پنجشېر والي حافظ محمد اغا حکیم د لوړو زده کړو پر ارزښت خبرې وکړې او ټینګار یې وکړ، چې د هېواد د لاسته راوړنو د ساتنې لپاره باید د علمي او فکري جهاد سنګر هم پیاوړی شي.
له بل لوري بيا قومي مشرانو او علماوو د یاد اقدام هرکلی کړی او د افغان حکومت له مشرتابه څخه یې د مننې ترڅنګ ډاډ ورکړی، چې د پنجشېر ولسونه له اسلامي نظام سره هر ډول همکارۍ ته چمتو دي.
د یادونې وړ ده، چې د پنجشېر د غرنۍ جغرافیې له امله یې خلک د اوسېدو ځایونو او کرنیزو ځمکو له جدي کمښت سره مخ دي؛ خو د خلکو له لوري په دې کچه د ځمکې وقف د افغان حکومت له وروستیو خدماتو د پنجشېر د ولسونو رضايت څرګندوي.