سي اېن اېن ټلوېزیون خبر ورکړی، چې د امریکا ولسمشر ډونالډ ټرمپ ویلي، له سعودي عربستان سره د ملکي اټومي همکارۍ تړون به یوازې هغه مهال تصویب شي، چې ریاض د ابراهیمي تړونونو برخه وګرځي.
ټرمپ دا څرګندونې داسې مهال کړې، چې یوه ورځ وړاندې له سعودي سره د ملکي اټومي همکارۍ د تړون تایید اعلان شوی و. نوموړي ویلي، په دې تړون کې به د اټومي موادو غني کول شامل نه وي او یوازې به د ملکي او سولهییزو موخو لپاره عملي کېږي.
د اکسیوس خبریال بارک رویډ هم د ټرمپ له قوله ویلي، متحده ایالات د هغو ملکي اټومي پروګرامونو ملاتړ کوي چې د اټومي موادو غني کول پکې نه ترسره کېږي، خو د سعودي تړون تصویب یې د ابراهیمي تړونونو له منلو سره مشروط کړی دی.
بلخوا، سياېناېن راپور ورکړی چې لا څرګنده نه ده د ټرمپ دغه نوی شرط به پر لاسلیک شوي تړون څه اغېز وکړي. د سعودي سفارت او سپینې ماڼۍ تر اوسه په دې اړه رسمي غبرګون نه دی ښودلی.