کانونو او پټروليم وزارت د حکومت د اطلاعاتو او رسنیو په مرکز کې د امارتي ادارو د يو کلنو لاسته راوړنو د تشريح پروګرام په اړه په جوړ شوي خبري کنفرانس کې وويل: په ۲۸ ولایتونو کې د ۶۴۷ کاني ساحو سروې، د ۲۰۰۰، ۵۰۰۰، ۱۰۰۰۰، ۲۵۰۰۰ او ۵۰۰۰۰ په مقیاس د جیولوژیکي نقشو ډیجیټل کول او د کاري فرصتونو رامنځته کول په تېر کال کې د دغه وزارت له مهمو فعالیتونو څخه دي.
چارواکي وايي، له کورنیو پانګوالو سره د ۸۰ کوچنیو کانونو قراردادونه لاسلیک شوي او د ۱۰ کوچنیو کانونو قراردادونه هم لغوه شوي دي.
د چارواکو په وینا، د کانونو وزارت دا مهال د شاوخوا ۱۰ میلیارد افغانیو په ارزښت د وړو کانونو ۱۶۷ فعال قراردادونه لري، چې له مخې یې په مستقیم او غیر مستقیم ډول زرګونه کسانو ته د کار زمینه برابره شوې ده.
چارواکي وايي، د تېر کال په اوږدو کې دغه وزارت د کانونو د پروسس ۵۲ جوازونه شرکتونو ته ورکړي دي.
د دغه وزارت د معلوماتو له مخې، د قیمتي ډبرو د قانوني استخراج لپاره طرزالعملونه ترتیب شوي او په تېرو درېیو کلونو کې یې د قیمتي ډبرو د غیر قانوني استخراج او قاچاق مخه نیولې ده.
چارواکي وايي، د تېر يوه کال په ترڅ کې په پنجشېر ولايت کې د زمرد کان شاوخوا ١٧٠٠ سيمې سروې او تثبيت شوي او د قانوني استخراج لپاره يې ٥٧٥ جوازونه صادر کړي، چې ١٥زره کسانو ته يې د کار زمينه برابره کړې ده.
چارواکي زیاتوي، چې تېر کال د څه باندې ۵،۵ میلیونه امریکايي ډالرو په ارزښت ۷۸ زره قیراط زمرد د داوطلبۍ له لارې پر کورنیو او بهرنیو پانګوالو پلورل شوي دي.
د چارواكو په وينا، په تېر يوه كال كې په هرات، تخار، غور، پروان، كابل، بغلان، فارياب او ننګرهار ولايتونو كې د ۱۳ لويو كانونو د استخراج تړونونه لاسليك شوي، چې زرګونو كسانو ته يې د كار زمينه برابره كړې ده.
د دغه وزارت د معلوماتو له مخې، اوسمهال په غور، بدخشان، پنجشیر، کندهار، غزني، لوګر، جوزجان، کندز او فاریاب ولایتونو کې ۱۲ مهمې پروژې تر کار لاندې دي او په غور، بادغیس او میدان وردګو، هرات، پروان، بامیان، کاپیسا او ننګرهار ولایتونه کې د یو شمېر نورو مهمو پروژو د پیل لپاره لازم تدابیر نیول شوي دي.
د چارواکو د معلوماتو له مخې، د فارياب ولايت په اندخوى ولسوالۍ کې د ۱۴ کيلومتره مربع د مالګې کان د ۲۴ ميليونه امريکايي ډالرو په ارزښت د ۱۵ کلونو لپاره او دغه راز په تخار ولايت کې د مالګې د کان قرارداد د ۵۰۰ ميليونو افغانیو په ارزښت له کورنیو شرکتونو سره لاسليک شوي دي.
د چارواکو په خبره، د قشقري، انګوت او آق دریا له ٢١ ساحو څخه د نفتي موادو د استخراج پروسه روانه ده، چې هره ورځ له دغو ساحو څخه شاوخوا ١٣٠٠ ټنه خام تېل استخراجېږي، چې له امله یې ۳ زره کسانو ته په مستقیم او غیر مستقیم ډول د کار زمینه برابره شوې ده.
دغه راز دغه وزارت د جوزجان ولایت په یتیم تاق سیمه کې د ګازو د زیرمو د پراختیا په موخه د ۳۳ او ۳۵ نمبر څاګانو د کیندلو تړون هم له یوه ترکي شرکت سره لاسلیک کړی دی.
د کانونو قانون، د هایدرو کاربنونو قانون او د ټاپي پروژې د استملاک قانون د بیاکتنې او تصویب لپاره ذیصلاح مراجعو ته استول شوي دي.
همدا راز د ۴۱ طرزالعملونو په ترتیبولو کار روان دی، چې له دې جملې څخه ۱۵ طرزالعملونه ترتیب شوي، ۴ طرزالعملونه تر کار لاندې دي او پاتې ۲۲ طرزالعملونه په پلان کې دي.
چارواکي وايي، تېر کال دغه وزارت د چارو د لا ښه تنظیم او پرمختګ په موخه له کورنیو او بهرنیو بنسټونو سره د همکارۍ ۸ تړونونه لاسلیک کړي دي.
د معلوماتو پر بنسټ، د کانونو سروې کول او د پانګونې د جلبولو لپاره د زمینې برابرول، د کوچنیو او لویو کانونو لپاره داوطلبي، د تقنیني اسنادو نهايي کول، په هېواد کې د سترو ملي او زیربنایي پروژو د تطبیق لپاره د اړینو فرصتونو برابرول او د سیستمونو پراختیا د یاد وزارت له مهمو لومړیتوبونو څخه دي.