کرنې وزارت د راتلونکي کال لپاره بزگرانو، مالدارانو او متشبثینو ته ۲.۲ مېلیارده افغانۍ طرحه تصویب کړه

د کرنې، اوبو لگولو او مالدارۍ وزارت وايي، د کرنې د پراختیا وجهي صندوق په خپله نهمه غونډه کې د راتلونکي کال لپاره بزگرانو، مالدارانو او دکرنې او مالدارۍ سکټورونو متشبثینو لپاره د اسلامي مالي چوپړتیاوو په موخه د ۲.۲ مېلیارده افغانیو د ورکړې طرحه تصویب کړه.له یاد وزارت څخه په خپره شوې خبرپاڼه کې ویل شوي، په دغه غونډه کې د کرنې وزارت د مسوولینو سربېره د مالیې وزارت او د مالي چارو کارپوهانو برخه اخیستې وه.: «دا پیسې راتلونکی کال د کرنې او مالدارۍ د ودې او پراختیا او د وکالې او مرابحې د اسلامي مالي خدماتو له لارې غوښتونکو لپاره په یادو سکتورونو کې د پانگونې د پراختیا لپاره ورکول کېږي، چې تر ۵ زره ډېر بزگران د دې پیسو تر پوښښ لاندې راځي.»په خبرپاڼه کې له بزگرانو غوښتل شوي، چې د کرنې د پراختیا صندوق چوپړتیاوې د کروندگرو، بڼوالو او بزگرانو لپاره گټور دي هڅه وکړئ، چې د اسلامي مالي خدمتونو په وړاندې کولو کې لا زیات اغېزمنتیا رامنځته او خلک له پورونو برخمن شي.د کرنې وزارت د بزگرانو لپاره د ۲.۲ مېلیارده افغانیو د ورکړې طرحه داسې مهال تصویبوي، چې د سږنۍ او مخکېنیو وچکالیو له امله گڼ شمېر بزگران زیانمن شوي دي.د کرنې برخې کارپوهان له حکومت غواړي چې په افغانستان کې د کرنې د عصري کولو لپاره دې لاس په کار شي، تر څو افغانستان په دغه برخه کې پر ځان بسیا شي.