یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
تېره ورځ آصف دراني وویل چې: «افغانستان نور د خبرو سرټکی نه دی» له خبرې یې معلومېږي چې درانی له دنیا او له رسنیو بېخي ناخبره دی؛ موده وړاندې د افغان حکومت د دوحې په ناسته باندې د ټولې نړۍ رسنۍ بوختې وې، زرګونه رسنیو د دوحې د ناستې موضوعات تعقیبول، همداراز د امریکا مطرح سیاستوال قطر کې پراته وو.
بله خبره یې دا وکړه چې: «د سپټمبر پېښه ښايي بیا له افغانستان څخه تکرار شي» دا د نوموړي بالذات ضد او نقیض خبره ده، هلته وایي چې افغانستان نور له پامه لوېدلی او هلته بیا وایي چې د سپټمبر پېښه ښايي بیا تکرار شي.
که دومره لویه پېښه له افغانستان څخه تکراریږي، ایا نړۍ به د افغانستان په مقابل کې بې تفاوته وي؟امریکا د خپل ملي امنیت د تضمین په خاطر نیمه نړۍ کې بوخته ده، دا بوختیا یې د نړۍ د ډېرو هېوادونو سره له نږدې کار کولو څخه عبارت دي.افغانستان د نړۍ د سیاستونو په محراق کې واقع دی؛ له چین، روسیې، منځني اسیا، خلیجو هیوادونو ټولو سره افغانستان تودې اړیکې لري.
اصلا په انزوا د دراني خپل حکومت واقع دی، د پاکستان صدراعظم وایي په هر هېواد چې سلام اچوو، سلام مو څوک ددې لپاره نه اخلي چې ګواکې له موږ پور/قرض و نه غواړي.
شهباز شریف په سټیج ولاړ او وایي چې موږ د سترګو لګېدو ځای نه دی پریښی؛ که ښي خوا ګورو قرضدار راته ولاړ وي پیسې غواړي، که کیڼ لوري ته ګورو پوروړی راته ولاړ وي، که مخکې ګورو پور ولا رانه پیسې غواړي که شاته مخ اړوو خلک رانه خپلې پیسې غواړي.
افغانستان قوي دپلوماسۍ لري، له دنیا سره د اسلامي اصولو سره سم تعامل غواړي، او په دې برخه کې د افغان حکومت له لوري کافي پرمختګونه شوي دي؛ په لوږې او نا امنۍ کې ګیر پاکستان کله زموږ مړه خېټه او ارام ژوند زغملی شي؟د آصف دراني خبرې پرته له رواني جګړې بل هدف نه لري، د پاکستان عمق استراتیژي افغانستان کې جګړه، فزیکي او ذهني نا امني ده.
د رواني نا امنۍ ښه وسیله میډیا ده، میډیا ته سافټ پاور وايي؛ که دوی غواړي چې موږ ووېروي او زموږ سیاستوال یې پښو ته ولوېږي چې څه وکړو یوه لار را وښیه؛ دا د دوی ډېره غلطه محاسبه ده.
نن سبا پاکستان خپله د بحرانونو سونامي په مخه کړی چې کله به ډوب شي؟ ښه دا ده چې پاکستانیان په خپلو ستونزو تمرکز وکړي او ځانونونه له بې شمېره ستونزو را وباسي.
