یادؤنه: په هندوکش غږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکش غږ توافق ورسره شرط نه دی.
درې کاله وړاندې چې ا.ا واک ترلاسه کړ، نو هیچا فکر نه وو کړی چې دا ځلې به طالبان د تېر امارت برعکس په سیاسي ډګر کې ډیرې لاسته راوړنې ولري.
په وروستیو دریو کلونو کې ا.ا په ګڼو هیوادونو کې د تېر حکومت د سفارتونو او کونسلګریو کنټرول ترلاسه کړی او دا لړۍ لا پسې روانه ده.
اوس اروپایي هیوادونو کې هم داسې څرکونه ښکاري چې ممکن ژر به د پرځېدلي جمهوریت سیاسي استازولۍ ا.ا ته وسپارل شي او په اروپا کې به خپل موقف لا پسې ټینګ کړي.
خو وړاندې له دې چې ا.ا اروپا ته ورسېږي، اروپایان له طالبانو راوړاندې شول او سویس به لومړنی هیواد شي چې افغانستان ته به راشي.
په سویس انفو ویبسایټ کې خپور شوي یو مطلب کې راغلي چې سویسي چارواکي به د روان کال په مني کې افغانستان ته راشي.
مطلب وایي چې د پرمختګ او همغږۍ له پاره د سویس اداره(SDC) به افغانستان لاړه شي، څو خپلې مرستې همغږې کړي؛ دا (SDC) د سویس د فدرالي دولت اداره ده چې په نړیواله کچه کیدونکې مرستې همغږې کوي.
دا به لومړی ځل وي چې د ا.ا په درې کلن حاکمیت کې کومه اروپایي ډله کابل ته راځي.
دا په داسې حال کې ده چې د ا.ا له واک ته رسېدو وروسته ګڼې اروپایي ادارې له افغانستانه ووتلې او خپل فعالیتونه یې بند کول، خو له درې کلن ځنډ وروسته بیا اروپایان افغانستان ته راځي.
دا ښه خبره ده چې اروپایان د ا.ا په حاکمیت کې د جګړې پر ځای د سولې چاپیریال کې افغانستان ته راځي.
افغانان چې اوسمهال له سختو بندیزو سره مخ دي او نړیوالو مرستو ته اړتیا لري، د اروپایي هیوادونو راتګ ممکن د افغانانو اقتصادي حالت ښه کړي او بېکارۍ په له منځه وړلو کې مؤثر ثابت شي.
د سویس له راتګ وروسته ښایي نور اروپایي هیوادونه هم افغانستان ته راتګ ته زړه ښه کړي.
د سویس دغې ادارې د طالبانو له لوري د کابل له نیولو وروسته خپل کارکاوونکي د پاکستان پلازمېنې اسلام اباد ته لیږدولي وو او اوس به له درې کلن ځنډ وروسته د دوی څلور کارکوونکي بیرته کابل ته راشي.
داسې ښکاري چې د نړیوالې ټولنې، په ځانګړي ډول د غربي هیوادونو له لوري د ا.ا د منزوي کولو هڅې ورو ورو ناکامېږي او ا.ا خپلو موخو ته د رسېدو په حال کې دی.