ایران ښایي په اوکراین کې د جګړې لپاره ژر سلګونه بالاستیک وسلې چې د سټلایټ د لارې رهبري کیږي، روسیې ته ولیږدوي.
دوو اروپایي استخباراتي سرچینو جمعه اګست نهمه ( زمري ۱۹) د رویټرز خبري اژانس ته دا معلومات ورکړیدي او دا یې هم ویلي چې د روسیې د پوځ لسګونه پرسونل په تهران کې روزل کېږي چې څرنګه د فتح -۳۶۰ بالاستیک توغندیو څخه کار واخلي.
دا توغندي لنډ واټن ویشتلی شي.دې دوو استخباراتي چارواکو چې نه یې غوښتل نومونه یې افشا شي ویلي چې ګمان کېږي د روسیې د دفاع وزارت استازو تېر کال د ډسمبر میاشتې په ۱۳ مې نېټې په تهران کې د ایراني چارواکو سره د فتح -۳۶۰ او ابابیل بالاستیک توغندیو تر لاسه کولو لپاره قرارداد لاسلیک کړی وي.
دا توغندي په ایران کې د هوایي فضا صنعت سازمان په نامه شرکت جوړوي چې د ایران د حکومت ملکیت دی.
د اروپایي اتحادیې دې چارواکو چې د څو محرمو استخباراتي سرچینو حوالې یې ورکړي، ویلی چې په ایران کې د روسیې نظامي پرسونل دا زده کوي چې څنګه د فتح -۳۶۰ دفاعي سیستم سره بیل کړي.
دا توغندي کولی شي چې تر ۱۶۰ کیلو مټرو پورې واټن ووهي او ۱۵۰ کیلو ګرامه سرګلوله لري.دې چارواکو ویلي چې تر روزنې وروسته به بل ګام دا وي چې دا توغندي روسیې ته ولېږدول شي.
سره له دې چې روسیه پخپله هم بالاستیک توغندي لري خو نظامي کارپوهان وایي چې که روسیه له ایران څخه د فتح -۳۶۰ توغندي تر لاسه کړي، په دې توغندیو به د لنډ واټن اهداف په نښه کړي او خپل توغندي به د جګړې لومړۍ کرښې څخه ور ها خوا لیرې اهداف په نښه کولو لپاره وکاروي.
د ایران او روسیې دفاع وزارتونو تر اوسه په دې هکله تبصره نه ده کړې خو د متحده ایالاتو د ملي امنیت شورا یو ویاند د جمعې په ورځ وویل که ایران دا توغندي روسیې ته ورکړي ، متحده ایالات، د ناټو متحدین او د نړۍ اوو سترو صنعتي یا جي -۷ هېوادونو شریکان به یې جدي او چټک ځواب ووایي.
دې ویاند زیاته کړه چې ایران دا اقدام به د اوکراین په خلاف د روسیې جګړې د کړکیچ ډېروالي لپاره د ایران بارز ملاتړ په ډاګه کړي.
واشنګټن په اوکراین کې د روسیې یرغل پیل کېدو راهیسې څو ځله د روسیې او ایران ترمنځ د امنیتي همکارۍ پراخوالي په هکله خبرداری ورکړی.
په عین حال کې په نیویارک کې په ملګرو ملتونو کې د ایران دایمي استازولۍ په یوې اعلامیې کې ویلي چې د نظامي همکارۍ په ګډون، ایران د روسیې سره په بېلا بېلو برخو کې د اوږدې مودې ستراتیژیکې همکارۍ جوړې کړیدي.
په دې اعلامیې کې ویل شوي چې د ” د اخلاقی نقطې نظره ایران د توغندیو په ګډون د هرې وسلې له لیږد ډډه کوي چې ممکن د اوکراین په شخړې کې به ترې کار واخیستل شي”.
د اروپایي اتحادیې دوو استخباراتي سرچینو دا ونه ویل چې دا توغندي به په دقیقه توګه څه وخت روسیې ته ولېږدول شي خو دومره یې ویلي چې ژر به وشي.
ها خوا بیا د ایران یو جګپوړي چارواکي چې غوښتل یې نوم یې په راپور کې یاد نشي، ویلي چې ایران په روسیې توغندي او بې پیلوټه یا ډرون الوتکې خرڅې کړې دي خو لا یې د فتح -۳۶۰ بالاستیک توغندي ندي ورکړي.
دې چارواکي همدارنګه ویلي، چې په روسیې باندې د ایران لخوا د دې ډول وسلو په پلور قانوني ممنوعیت نشته.