د افغانستان برېښنا شرکت ویلي، چې د افغانستان او ازبکستان د برېښنا مسوولینو د سرخان–پلخمري ۵۰۰ کیلوولټ برېښنا لېږد پروژې د پاتې چارو، مالي تادیاتو او تخنیکي ستونزو د حل او د عملي فعالیتونو د چټکتیا په اړه یې ګډه ناسته کړې ده.
د یاد شرکت په وینا د افغانستان برېښنا شرکت د عمومي اجرائیوي رئیس ملا عبدالحق همکار او د ازبکستان د انرژۍ وزارت د مرستیال او تخنیکي مسوولینو په ګډون، په دې ناسته کې د یادې پروژې د پرمختګ، شته ننګونو او نورو اړوندو پروژو په اړه خبرې شوې دي.
ملا عبدالحق همکار د پروژې پر ستراتیژیک او اقتصادي ارزښت ټینګار کړی او ویلي یې دي، چې د دې پروژې بشپړېدل به د افغانستان د برېښنا رسولو ظرفیت لوړ او برېښنايي شبکه پیاوړې کړي او د دواړو هېوادونو ترمنځ به د انرژۍ همکارۍ او د برېښنا سوداګرۍ پراختیا ته زمینه برابره کړي.
په ناسته کې د پروژې د تمویل او مالي تادیاتو، د سبسټېشنونو د تجهیزاتو د تولیدوونکو شرکتونو د معرفي کولو، د ډیزاین او تخنیکي اسنادو د بشپړولو، د تخنیکي او سوداګریزو اسنادو د اختلافاتو د حل او د ځنډېدلو ساحوي فعالیتونو د بیا پیل په اړه هم بحثونه شوي دي.
دواړو لورو د پاتې چارو د چټکتیا، د خنډونو د لرې کولو او د اړوندو ادارو ترمنځ د همغږۍ د پیاوړتیا لپاره د مشخص کاري پلان پر چمتو کولو هوکړه کړې، څو پروژه د ټاکل شوي مهالوېش له مخې بشپړه او ګټې اخیستنې ته وسپارل شي.