د صنعت او سوداګرۍ وزارت په یوه خبرپاڼه کې ویلي، چې د یاد وزارت وزیر نورالدین عزیزي د تانزانیا د پانګونې د اووم کنفرانس په څنډه کې د کینیا د کانونو له وزیر حسنعلي جوه سره لیدلي او د دواړو هېوادونو ترمنځ د اقتصادي او سوداګریزو اړیکو پر پراختیا یې خبرې کړې دي.
د دواړو لوریو ترمنځ د کانونو د پروسس او صادراتو، کرنیزو او صنعتي تولیداتو، د پانګونې فرصتونو او د دواړو هېوادونو په بازارونو کې د متقابلو محصولاتو د حضور پر زمینې بحث شوی دی.
د صنعت او سوداګرۍ وزیر له کینیا څخه د چای، قهوې او نورو محصولاتو د واردولو او د سوداګریزو راکړو ورکړو پر زیاتوالي ټینګار کړی دی.
دغه راز دواړو لورو د ګډو نندارتونونو پر جوړولو او د همکاریو د عملي کولو لپاره د یوې ګډې کاري ډلې د رامنځته کولو په موخه د تفاهملیک پر ترتیب او لاسلیک هوکړه کړې ده.


