لیکوال: محمد فیصل
د قطر پلازمېنې دوحه کې د افغانستان په تړاو د ملګرو ملتونو په کوربتوب درېیمه غونډه له دوه ورځو خبرو او لیدنو کتنو وروسته پای ته ورسېده؛ دا لومړی ځل وو چې واک ته له رسېدو وروسته افغان حکومت له ملګرو ملتونو سره مخامخ خبرې کولې.
د افغان پلاوي مشري د اسلامي امارت مرکزي ویاند مولوي ذبیح الله مجاهد او د ملګرو ملتونو له لوري د سرمنشي مرستیالې ډیکارلو ګډون کړی وو؛ له دوی سربېره د ۲۵ هیوادونو ځانګړي استازي هم دغې غونډې ته بلل شوي وو.
افغان حکومت له څو اړخه د دغې غونډې ګټونکی دی.
لومړی دا چې د غونډې اجنډا له افغان حکومت سره په همغږۍ جوړه شوې وه او دا د دې ښودنه کوي چې افغان حکومت او ملګري ملتونه ورو ورو یو بل ته نږدې کېږي.
دویم دا چې له ملګرو ملتونو سره د افغان حکومت مخامخ ناسته دا ثابتوي چې ملګري ملتونه او نړۍ، په ځانګړي ډول لوېدیځ هیوادونه، اوس طالبان د افغانستان د اصلي او واقعي واکمنو په توګه پېژني او د یو حکومت په توګه ورسره چلن کوي.
هغوی ومنله چې افغان حکومت سره له تعامل او خبرو پرته بله لاره نشته او د بحرانونو د مخنیوي او فرصتونو څخه د استفادې له پاره له افغان حکومت سره خبرې یوازینۍ لاره ده.
درېیم دا چې ښایي تر ټولو مهمه ګټه چې اسلامي امارت ترلاسه کړه، دا ده: چې د مخکیني حکومت مفسدینو او د شر و فساد مشرانو ته ثابته شوه چې د هغوی منډو او سوال و زاریو هیڅ ځای و نه نیوه او طالبانو ترې له جګړې وروسته سیاسي ډګر هم فتحه کړ.
شر و فساد د دوحې له دغې غونډې وړاندې د اتریش مرکز ویانا کې غونډه لرله؛ هغه فکر کاوه چې د دوحې دغه ناسته به ناکامه یا تر سیوري لاندې راولي، خو هغه د چا خبره چې چا ورته واښه هم وانچول او حاشیې ته پاتې شول.
داسې ښکاري چې شر و فساد به نور له هرې صحنې بهر کېږي او د دوحې درېیمه ناسته کې د طالبانو مخامخ ګډون طالبانو ته د نړۍ او لوېدیځ له لوري شین څراغ وو.