د ریاست الوزراء اقتصادي مرستیال ملا عبدالغني برادر په مشرۍ په جوړه شوې غونډه کې د افغانستان ـ ازبېکستان ترمنځ د سوداگریزو اړیکو د څار په موخه ځانگړې کمېټې ټاکل شوې دي.
له ارگ څخه په خپره شوې خبرپاڼه کې ویل شوي، په دې غونډه کې ازبېکستان ته د اسلامي امارت د اقتصادي پلاوي د سفر پر مهال د نهايي شوو موضوعاتو د تعقیب لپاره ځانگړې کمېټې وټاکل شوې. :«د افغانستان او ازبېکستان ترمنځ د دوه اړخیزو سوداگریزو او ترانزیټي اړیکو د پراختیا، د دواړو هېوادونو تر منځ د سوداگرۍ پر متوازن بیلانس، د باروړونکو موټرونو د شمېر پر زیاتوالي، د حیرتان بندر پر ۲۴ ساعته کولو، د گډې سوداگریزې خونې د جوړېدو، په ترمذ کې د افغان – ازبېک گډ سوداگریز مرکز څخه پر گټهاخیستنې، د دواړو هېوادونو ترمنځ د قرنطین اړوندو هوکړهلیکونو د نهایي کولو، د اوسپنې، مسو او ډبرو سکرو په کانونو کې د ازبېک پانگهوالو د پانگونې، په افغانستان کې د سیمنټو د تولیدي کارخونې د جوړېدو، د ترمذ- مزارشريف تر هرات او کندهار پورې د اوسپنې پټلۍ شبکې غځولو کې د ازبېکستان د همکارۍ، د نایب آباد سټېشن پر پراختیا، د سورخان- پلخمري د برېښنا لېږد په برخه کې د ازبېکستان پر پانگونې او یو شمېر نورو موضوعاتو په اړه ټاکل شوو کمېټو ته دندې وسپارل شوې، څو یاد موضوعات په جدي ډول تعقیب او په ټاکلو وختونو خپل راپورونه د ریاستالوزراء اقتصادي معاونیت مقام سره شریک کړي.»
دا په داسې حال کې ده، چې تېره اوونۍ د افغانستان د صنعت او سوداگرۍ وزیر په مشرۍ یو پلاوی ازبېکستان ته تللی و او هلته یې له ازبېک چارواکو سره په گڼو سوداگریزو اړیکو خبرې کړې وې.
په دې وروستیو کې د افغانستان او ازبېکستان اړیکې تودې شوې او ازبېک پانگهوالو په گڼو برخو کې د پانگونې ژمنه کړې ده.
