د ریاستالوزراء اقتصادي مرستیال ملا عبدالغني برادر اخوند هلمند ته د خپل کاري سفر پر مهال له کجکي بند څخه لیدنه کړې ده او ځايي مسوولینو ته یې ځینې اړینې سپارښتنې هم کړې دي.
له اقتصادي مرستیال دفتر څخه په خپره شوې خبرباڼه کې ویل شوي، ملا عبدالغني برادر د کجکي بند پروژې د مسوولینو د تر سره شوو چارو ستاینه وکړه او هغوی ته یې د کارونو د لا ښه والي په موخه لازمې سپارښتنې وکړې.
:«وچکالۍ او په بندونو کې د اوبو د کمښت له امله د برېښنا د تولید کچه هم راټیټه شوې وه، خو سږ کال په هېواد کې د پرېمانه ورښتونو له امله د اوبو کچه لوړه شوې او د کجکي بند په څېر زیاتره بندونه له اوبو ډک شوي دي.»
د خبرپاڼې له مخې، له دې سره به په روان کې کال د کرنې برخه وده وکړي او هم به په هېواد کې دننه د برېښنا د تولید کچه لوړه شي.
د یادونې وړ ده، چې د کجکي بند د هېواد په کچه یو له لویو بندونو څخه دی، چې د هلمند ولایت په کجکي ولسوالۍ کې د هلمند پر سیند د موسمي سېلابونو د کنټرول، کرنیزو ځمکو خړوبولو او برېښنا د تولید په موخه جوړ شوی دی.
د یو بل خبر له مخې، ملا عبدالغني برادر په روزگان ولایت کې د وروستیو سېلابونو له امله د زیانمنو شوو کورنیو سره د مرستې موخه یاد ولایت ته سفر کړی دی او په دغه ولایت کې یې له بېلابېلو خلکو سره لیدلي دي.«دا هغه خلک دي چې د اسلامي نظام د راتگ لپاره یې هر ډول قربانۍ ورکړې دي او ډېر تکلیفونه یې گاللي دي، اوس یې حق دی چې اسلامي امارت د ارام ژوند زمینه ورته برابره کړي.»
نوموړي ویلي، که د هېواد په هر گوټ کې هېوادوال په مشکل کې وي، د اسلامي امارت مسوولین مکلف دي، چې د دوی حال واخلي او ستونزو ته یې پر وخت رسېدنه وکړي.