د ریاست الوزراء اقتصادي معاونیت وايي، په روان ۱۴۰۲ کال کې د برېښنا په سکتور کې ۱۶ بېلابېلې پروژې پیل کړي، چې یو شمېر یې بشپړې او د یو شمېر نورو کارونو په ډېر ژر پیل شي.
له اقتصادي معاونیت څخه په خپره شوې خبرپاڼه کې ویل شوي، په دې پروژو کې د کمال خان بند د پاتې چارو، د بخشاباد بند د عملي چارو، د شاه و عروس بند د پاتې چارو او په هرات کې د ۲۰۰ مېگاواټه بادي برېښنا د تولید پروژو چارو پیلول شامل دي.: «همداراز په دې موده کې د هېواد له شمال څخه جنوب ته د ۵۰۰ کیلو ولټه برېښنا لېږد مزي غځول، د کابل په شمول په ډېری ولایتونو کې د لمريزې برېښنا د تولید پروژې، په کابل کې د سروبي دوهم بند، روزگان کې د اغا جان بند، میدان وردگو کې د چک بند، سرپل کې د سلطان ابراهیم بند، کونړ کې د مناگي بند او زابل کې د توري بند د جوړېدو کارونه پیل شوي.»
د خبرپاڼې له مخې، د دې ترڅنگ د هېواد په بېلابېلو ولایتونو کې د سب سټېشنونو جوړول او بیارغونه، له ترکمنستان څخه هرات ته د ۲۲۰ کیلو ولټ مزي غځول، له کجکي تر کندهار پورې د ۱۱۰ کیلو لوټه برېښنا د لېږد د مزي چارو بشپړول هغه پروژې دي چې چارې یې بشپړې شوې دي او همدارنګه د کاسا زر پروژې چارې به په نږدې راتلونکي کې په عملي ډول پیل شي.