د رياستالوزراء اقتصادي معاونیت د یوې خبرپاڼې په خپرولو سره ویلي، چې په کندهار، زابل او هلمند ولایتونو کې د برېښنا درېیو لویو پراختیايي پروژو پاتې چارې پيل شوې.
د خبرپاڼې له مخې، د ریاستالوزراء اقتصادي مرستیال ملا عبدالغني برادر په همدې موخه جوړو شویو مراسمو کې ویلي، دا پروژې د برېښنا په برخه کې ځان بسیاینې ته د رسېدو، د نویو کاري فرصتونو رامنځته کولو او زېربنا پياوړتيا پر لور مهم ګامونه دي، چې په مرسته به یې د کجکي بند برېښنا په بشپړ ډول کندهار ته ولېږدول شي.
ښاغلي برادر زیاته کړې ده، چې سرپرست حکومت په کور دننه له شته سرچینو څخه په ګټې اخیستنې د برېښنا د تولید په برخه کې جدي هڅې کوي چې په همدې موخه یې څه موده وړاندې له خصوصي سکټور سره په بېلابېلو ولایتونو کې د ۲۵۰ میګاواټه په ظرفیت له لمر، باد او ګازو څخه د برېښنا تولید تړونونه لاسلیک کړي دي.
د ریاست الوزراء اقتصادي معاونیت د خبرپاڼې له مخې، په یادو پروژو کې د زابل مرکز قلات سبسټېشن او د کندهار ختیځ سبسټېشن د پاتې چارو بشپړول او همداراز له کجکي برېښنا تولیدي فابریکې څخه د کندهار ختیځ سبسټېشن پورې د ۱۱۰ کېلوولټ برېښنا لېږد مزي غځول شامل دي.
خبرپاڼه زیاتوي پر یادو پروژو نږدې یو میلیارد افغانۍ لګښت راځي چې سلګونه زره نوي پېرودونکي به له برېښنا برخمن او ډېرو هېوادوالو ته به کاري فرصتونه رامنځته کړي.