الجزيرې راپور ورکړی، چې امریکا د اسرائیلي چارواکو هغه وړانديز رد کړی چې له غزې څخه د فلسطینیانو د ایستلو غوښتنه یې کړې وه او ټینګار یې کړی و، چې واشنګټن بايد د غزې د اوسېدونکو له جبري شړلو ملاتړ وکړي.
د امریکا د بهرنیو چارو وزارت ویلي، واشنګټن لا هم د ولسمشر ډونالډ ټرمپ د سولې د ۲۰ مادهییز پلان ملاتړ کوي، چې له مخې یې هېڅوک له غزې وتلو ته نه اړ کېږي او هغه کسان چې غواړي ووځي، د بېرته ستنېدو حق به هم ولري.
دا څرګندونې وروسته له هغې شوي چې د اسرائیلو دفاع وزیر اسرائیل کاتس وویل، له غزې د خلکو ایستل د کړکېچ یوازینۍ حللاره ده. هغه زیاته کړې چې اسرائیل چمتو دی فلسطینیان «د سمندر، هوا او هرې ممکنې لارې» له غزې وباسي.
د اسرائیلو د ملي امنیت وزیر ایتامار بنګوېر هم د کاتس د څرګندونو ملاتړ کړی او د فلسطینیانو د جبري کډه کولو غوښتنه یې کړې ده.
ياده دې وي، چې پر امریکا سربېره یو شمېر عربي هېوادونو هم د فلسطینیانو د ایستلو هر ډول هڅه په کلکه رد کړې ده.