د امریکا مرکزي قوماندانۍ (سنټکام) اعلان کړی، چې د ولسمشر په امر امریکايي ځواکونو د ختیځې امریکا پر وخت د ماښام په ۶ بجو پر ایران نوي هوايي بریدونه پیل کړي دي.
سنټکام ویلي، د دغو بریدونو هدف په هرمز تنګي کې د سوداګریزو بېړیو پر وړاندې د ګواښونو کمول او د سپاه پاسداران ځواکونو هغو اقداماتو ته ځواب ویل دي، چې د امریکا په وینا، پر امریکايي ځواکونو یې بریدونه کړي دي.
امریکايي قوماندانۍ همداراز ویلي، د ایران پر ضد د روانو سمندري عملیاتو په ترڅ کې یې د جولای تر ۱۸مې پنځه سوداګریزې بېړۍ بېرته ګرځولې او یوه بېړۍ یې له فعالیته ایستلې ده.
په ورته مهال، د ایران د سپاه پاسداران اړوند قرارګاه مرکزي قوماندانۍ خبرداری ورکړی، چې د هر ډول برید او «دښمنانه اقدام» پر وړاندې به سخت او ویجاړوونکی ځواب ورکړي.
د قرارګاه قوماندانۍ ویلي، وسله وال ځواکونه به د ایران د امنیت او ملي ګټو د دفاع لپاره له ټولو امکاناتو کار واخلي او هر ډول زورواکي به له درنو پایلو سره مخ شي.