تسنیم خبري اژانس راپور ورکړی، چې امریکا په لوېدیځه اسیا کې خپلو اتباعو ته د سیمې د امنیتي وضعیت
د خرابېدو او د تاوتریخوالي د احتمالي زیاتېدو په اړه خبرداری ورکړی او د الوتنو د لغوه کېدو او هوايي حریم د احتمالي تړل کېدو په اړه یې هم د احتیاط سپارښتنه کړې ده.
د راپور له مخې، په فلسطین، لبنان، عمان، بحرین او عراق کې د امریکا سفارتونو هم په ورته مهال جلا خبرتیاوې خپرې کړې او په سیمه کې یې د کړکېچ د زیاتېدو احتمال یاد کړی دی. له امریکايي اتباعو غوښتل شوي چې د سفر او تګ راتګ پر مهال لازم احتیاط وکړي.
په دغو خبرتیاوو کې ویل شوي چې په راتلونکو ورځو کې د ځینو الوتنو د لغوه کېدو احتمال شته او د سیمې د هوايي تګ راتګ په وضعیت کې ناڅاپي بدلون رامنځته کېدای شي. د امریکا د بهرنیو چارو وزارت هم په وروستیو لارښوونو کې په منځني ختیځ کې د احتمالي چټک بدلون او د الوتنو د ګډوډېدو په اړه خبرداری ورکړی دی.