ځینو رسنیو ادعا کړې چې: “د تخار ولایت د خواجه غار ولسوالۍ قاضي، مولوي شهیدالله د ٥٠ زره ډالرو په مقابل کې څلور تنه قاتلین د محکمې له مجازاتو پرته خوشي کړي دي”.
یوې امنیتي سرچینې هندوکش غږ ته د دې قضیې په اړه داسې وویل چې: د تخار ولایت په خواجه غار ولسوالۍ کې داسې کومه پېښه نه ده شوې چې قاتلین دې د پیسو په مقابل کې خوشي شوي وي، بلکې یاد کسان په محکمه کې د جانبینو په توافق د اته لکه افغانیو دیت ورکولو سره په ضمانت خوشي شوي دي، خو د قاتل پلار اوسمهال تښتېدلی او ضمانت کوونکي بندیان دي؛ نو په یاده قضیه کې د رشوت خبره له حقیقت څخه لېري ده.
یوې باوري سرچینې هندوکش غږ ته وویل چې: په تخار ولایت کې هېڅ داسې قضیه نه ده پېښه شوې چې قاتلین دې د رشوت په مقابل کې خوشي شوي وي، او د ځینو رسنیو ادعا یې تش افواهات او شائعه بللې.
د یادؤنې وړ ده چې په دې وروستیو کې په ټولنیزو رسنیو کې ځینې داسې ادرسونه او اکاونټونو جوړ شوي چې ناسم معلومات او افواهات خپروي چې ګڼ شمېر هیواد وال یې په تشویش کې اچولي دي.