د ننګرهار ولایت له امنیه قومندانۍ څخه په خپره شوې خبرپاڼه کې راغلي، چې امنیتي ځواکونو هغه کس چې د دغه ولایت د بټي کوټ ولسوالۍ اړوند د کوزو مشواڼو په سیمه کې خپله مېرمن زندۍ کړې او وژلې وه نیول شوی دی.
د خبرپاڼې له مخې، د پېښې له راپور سره سم د بټي کوټ امنیه قومندانۍ منسوبین سمدستي د پېښې ځای ته رسیدلي او قاتل یې نیولی دی.
یاد کس د لومړنیو څېړنو پر مهال په خپل جرم اعتراف کړی، او دا مهال د بټي کوټ د امنیه قومندانۍ په توقیف کې تر جدي پوښتنو لاندې دی.