د بهرنیو چارو وزیر مولوي امیرخان متقي له بي بي سي فارسي سره په مرکه کې ویلي، امریکا له نظامي ځواک پرته یوازې په ډيپلوماټيک ډول افغانستان ته راتللی شي.
ښاغلي متقي ویلي، د امریکا په ګډون له ټولو هېوادونو سره ښې اړیکې غواړو.
د بهرنیو چارو سرپرست وزیر، مولوي امیرخان متقي و ویل: «کله چې موږ په دوحه کې له امریکايي وګړو سره مذاکرات درلودل، هلته مو هم هغوی ته ویلي وو، او اوس یې هم وايو په افغانستان کې د امریکايي وګړي پوځي یونیفورم نه منو خو که له ډيپلوماټيک یونیفورم سره راځي ستونزه نشته.»
همدارنګه ښاغلي متقي له افغانستان سره د امریکا د مرستو په اړه ویلي، چې په تېرو درېیو کلونو کې امریکا له اوسني حکومت سره یو ډالر مرسته هم نه ده کړې او د دوی مرستې نړۍوالو سازمانونو او بهر ته د تللو افغانانو په تخلیه کې شوې دي.
هغه دغه راز ټینګار کړی، چې د سرپرست حکومت له لوري له هیڅ مرسته کوونکي بنسټ مالیه او حق العبور نه اخیستل کېږي.
ښاغلي متقي زیاته کړه: «هغه مرستې چې د هېوادونو له لوري شوې دي، په ځانګړې توګه د امریکا له لوري، د تېر په څېر سیسټم دی چې د ملګرو ملتونو او یا کومې موسسې ته چې دلته فعاله وي، ورکول کیږي. په تېرو درېیو کلونو کې د افغانستان حکومت ته یو ډالر هم نه دی ورکړ شوی.»
نوموړي په یو شمېر هېوادونو کې د کونسلګریو د تړلو علت فساد بللی او زیاته کړې یې ده، چې په بهر کې مېشت هېوادوال کولای شي، په نږدې هېوادونو کې خپلې ستونزې حل کړي: «موږ هڅه وکړه چې دغه استازولۍ له حکومت سره تعامل وکړي، او له مرکز سره په اړیکه کې وي ترڅو هلته چې کوم فساد او اختلاس دی هغه له منځه ولاړ شي خو؛ له بده مرغه داسې ونه شول او اخر اړ شو چې بې واکه یې اعلان کړو.
د بهرنیو چارو سرپرست د ټاکنو په اړه ویلي، چې ټول ټاکنو په افغانستان کې کومه مثبته پایله نه ده ورکړې او دوی په دې اړه تر اوسه هیڅ پرېکړه نه ده کړې.
